وفاقی کابینہ نے سرکاری ملازمین دیاں تنخواہواں چ اضافے دی منظوری دے دتی
اسلام آباد: وفاقی کابینہ نے آئندہ مالی سال دے بجٹ چ سرکاری ملازمین دیاں تنخواہواں چ 7 فیصد اضافے دی منظوری دے دتی۔
وزیراعظم شہبازشریف دی زیرصدارت وفاقی کابینہ دا اجلاس پارلیمنٹ ہاؤس چ ہویا جیہدے دوران کابینہ نے آئندہ مالی سال دے بجٹ دستاویزات تے فنانس بل دے مسودے دی منظوری دتی۔
وفاقی کابینہ دے اجلاس دے دوران سرکاری ملازمین دیاں تنخواہواں چ 7 فیصد اضافے دی منظوری وی دتی گئی۔
ذرائع دے مطابق سرکاری ملازمین دیاں تنخواہواں چ دو فیز چ اضافہ ہوئے گا، گریڈ ایک توں 16 دے ملازمین دیاں تنخواہواں چ زیادہ اضافہ ہوئے گا۔
وفاقی کابینہ دے اجلاس نال خطاب چ وزیر اعظم نے آکھیا کہ اج اسیں اپنی حکومت دا تیسرا بجٹ پیش کرن جا رہے آں، توقع اے تیسرا بجٹ ساڈی معیشت نوں مزید تیزی نال اگے لے کے جائے گا، سارے معاشی چیلنجز دے باوجود بہتر بجٹ پیش کرن دی کوشش کیتی، عوام دا شکریہ ادا کرنا واں جیہناں نے وڈے صبر و تحمل نال مہنگائی نوں برداشت کیتا۔
وزیر اعظم نے آکھیا کہ مہنگائی 38 فیصد توں گھٹ ہو کے سنگل ڈیجٹ چ آئی پر خلیج دی صورتحال پاروں ایس چ تھوڑا اضافہ ہو گیا، سارے چیلنجز دے باوجود اج ساڈی معیشت بہتر ہو رہی اے۔
وزیر اعظم شہباز شریف نے آکھیا کہ ایس بجٹ نوں بنان چ بہت چیلنجز سن، سانوں عام آدمی دیاں مشکلاں دا بخوبی اندازہ اے۔
وزیر اعظم شہباز شریف نے آکھیا کہ سانوں سولر، ونڈ تے بیٹری اسٹوریج ورگے توانائی دے ذرائع تے توجہ دین دی لوڑ اے، سانوں پانی دے ذخائر تے ڈیمز تعمیر کرنے نیں۔
