خیبرپختونخوا پولیس نے حکومت توں شہدا پیکج چ اضافے دا مطالبہ کر دتا
پشاور: محکمہ پولیس خیبرپختونخوا نے صوبائی حکومت توں شہدا پیکج چ اضافے دا مطالبہ کر دتا۔
تفصیلات دے مطابق محکمہ پولیس نے شہدا پیکج چ اضافے بارے سفارشات تیار کر کے سمری محکمہ داخلہ نوں گھل دتی اے جیہدے چ آکھیا گیا اے کہ دوجے صوبیاں دے مقابلے چ کے پی پولیس دے شہدا تے زخمیاں دا پیکج گھٹ اے، پولیس اہلکاراں دا مورال وڈھان لئی شہدا پیکج چ اضافہ ضروری اے۔
محکمہ پولیس دیاں سفارشات چ آکھیا گیا اے کہ انسپکٹر تیکر شہید پولیس اہلکاراں دا شہدا پیکج اک کروڑ 10 لکھ روپے تیکر وڈھایا جائے، شہید کانسٹیبل دے وارثاں نوں 5 مرلے تے شہید انسپکٹر دے وارثاں نوں 7 مرلے دا پلاٹ دتا جائے، شہید ڈی ایس پی تے اے ایس پی دے وارثاں نوں اک کروڑ 60 لکھ روپے معاوضہ دتا جائے جدکہ وارثاں لئی 10 مرلے دا پلاٹ دین دی سفارش وی کیتی گئی اے۔
دستاویزات چ آکھیا گیا کہ شہید پولیس اہلکاراں دی ہر دھی (بیٹی) دے ویاہ تے 8 لکھ روپے برائیڈل گفٹ وارثاں نوں دتا جائے، دہشت گردی چ پولیس اہلکاراں دے گھر، گڈی یا دوجے اثاثیاں دے نقصان دا معاوضہ دتا جائے، ڈیوٹی یا دہشت گردی دے واقعے چ پولیس اہلکار دے نال زخمی یا شہید ہون والے رشتے دار نوں وی معاوضہ دتا جائے، متاثرہ پولیس اہلکار دی ٹبری (بیوی) تے بچیاں نوں 50 لکھ، ماپیاں (والدین) تے بھین بھراواں نوں 30 لکھ روپے دتے جان۔
محکمہ پولیس دیاں سفارشات چ آکھیا گیا اے کہ گریڈ 18 توں 22 دے شہید پولیس افسراں دے لواحقین لئی 2 کروڑ 10 لکھ روپے دا شہدا پیکج رکھیا جائے، ایس توں علاوہ گریڈ 18 توں 22 تیکر شہید پولیس افسراں دے لواحقین نوں اک کنال دا پلاٹ دین دی سفارش وی کیتی گئی اے۔
