وفاقی حکومت نے سندھ دے 229ارب روپے تے ڈاکہ پایا: وزیراعلیٰ سندھ

وزیراعلیٰ سندھ مراد علی شاہ دا کہنا اے وفاقی حکومت نے سندھ دے 229ارب روپے تے ڈاکہ پایا اے۔ کراچی وچ پوسٹ بجٹ پریس کانفرنس کردیاں وزیراعلیٰ سندھ مراد علی شاہ دا کہنا سی پچھلے ورھے اسیں متوازن بجٹ دتا سی پر ایس ورھے کورونا دی وجہ توں نقصان ہویا اے جد کہ ایہدے علاوہ ہون والا نقصان وفاقی حکومت دی نااہلی اے، سانوں ایس ورھے وفاق توں 229ارب روپے گھٹ ملن گے، ایہنوں 229ارب دا ڈاکہ نہ کہواں تے کیہ کہواں۔ وزیراعلیٰ سندھ آکھیا محسوس ہوندا اے وفاق دے اعلان کیتے اعداد و شمار وی درست نہیں، وفاق نے اجے تک سندھ نوں 606ارب دے مقابلے وچ 553ارب روپے فراہم کیتے نیں جد کہ سندھ نوں آکھیا جا رہیا اے کہ اگلے ورھے ایہنوں 760ارب روپے ملن گے۔ مراد علی شاہ آکھیا ترقیاتی بجٹ 233ارب رکھیا اے جد کہ 700سکیماں ایس ورھے مکمل کراں گے تے پرانی سکیماں نوں 25فیصد رقم دتی اے، سوائے محکمہ صحت دے کسے ہور محکمے دی نویں سکیماں شامل نہیں کیتی، ایہدے علاوہ اسیں تنخواہواں ودھائیاں۔ اک پیغام دینا چاہنے آں کہ مشکل حالات وچ سرکاری ملازماں نوں کلیاں نہیں چھڈ سکدے۔