پاکستان نے امریکا تے ایران نوں ٹیبل تے بٹھایا، اسرائیل دی کوشش سی تنازع جاری رہے: خواجہ آصف

اسلام آباد: وزیر دفاع خواجہ آصف دا کہنا اے کہ پاکستان نے امریکا تے ایران نوں ٹیبل تے بٹھایا تاکہ گل بات (گفت و شنید) ٹٹے نہ، اسرائیل دی خواہش تے کوشش ایہو ہی سی کہ تنازع جاری رہے۔

جیو نیوز نال گل بات کردیاں خواجہ آصف نے امریکا، ایران ممکنہ معاہدے تے آکھیا کہ ان شاء اللہ معاہدہ اک دو دناں وچ ہو جائے گا، پاکستان نے دوواں دھراں (فریقین) نوں ٹیبل تے بٹھایا تاکہ گل بات ٹٹے نہ، وکھو وکھ ویلیاں وچ اسرائیل نے منفی تے تباہ کن کردار ادا کیتا۔

خواجہ آصف دا کہنا سی کہ لبنان دے اندر اسرائیل نے بے گناہ بچیاں تے شہریاں نوں شہید کیتا، اسرائیل دی خواہش تے کوشش ایہو ہی سی کہ تنازع جاری رہے، اسرائیل چاہندا سی امریکا نوں اس خطے وچ پھسا (انگیج) کے رکھے، میں سمجھدا واں امریکی انتظامیہ نے دانشمندی دا ثبوت دتا اے، جس طرحاں اک عالمی لیڈر دا رویہ ہونا چاہیدا اے، امریکا نے اوہدی مثال قائم کیتی۔

ایران دے بارے وچ خواجہ آصف دا کہنا سی کہ ایرانیاں نے اپنی 5، 6 ہزار سال پرانی تاریخ رقم کیتی اے، ایران نے بہادری تے وطن دی محبت نال سرشار ہو کے اپنا دفاع کیتا، دوواں ملکاں نے دانشمندی دا ثبوت دتا اے۔