متحدہ عرب امارات حملے روکن لئی ایران نوں ارباں ڈالر جاری کرن تے راضی ہو گیا: خبر ایجنسی
متحدہ عرب امارات نے ایران لئی ارباں ڈالر جاری کرن تے رضامندی ظاہر کیتی اے۔
غیر ملکی خبر رساں ایجنسی رائٹرز دے مطابق ذرائع نے دسیا کہ ایہ پیش رفت ایران تے امریکا دے وچکار جنگ دے خاتمے بارے جاری مذاکرات دے آخری مرحلیاں دے دوران سامنے آئی اے۔
دو علاقائی ذرائع دے مطابق متحدہ عرب امارات نے تقریباً 10 ارب ڈالر جاری کرن تے اتفاق کیتا اے جیہناں وچوں 3 ارب ڈالر توں ودھ رقم پہلے ہی ایران نوں فراہم کیتی جا چکی اے، جڈوں کہ دوجے دو ذرائع دا کہنا اے کہ کل رقم 20 ارب ڈالر تیکر ہو سکدی اے تے ایہ قدم ایران دے حملے روکن دے بدلے چکیا گیا اے۔
رپورٹ دے مطابق ایہ صاف پتا نہیں لگ سکیا کہ ایہ رقم متحدہ عرب امارات دی اپنی اے یا اماراتی بینکنگ سسٹم وچ موجود ایرانی فنڈز یا دوجے بیرونی کھاتیاں توں اے۔
اک اماراتی عہدیدار نے ایس پیش رفت تے گل کردیاں آکھیا کہ ملک خطے وچ کشیدگی گھٹ کرن تے امن نوں ودھاؤن لئی اقدامات کر رہیا اے۔
ذرائع دے مطابق ایس انتظام دے تحت ایران متحدہ عرب امارات تے میزائل تے ڈرون حملے روک دے گا، جڈوں کہ دوہاں ملکاں دے وچکار تعلقات دی بحالی، انٹیلی جنس تعاون تے اقتصادی رابطیاں وچ بہتری وی شامل ہو سکدی اے۔
خبر رساں ایجنسی دے مطابق ایہ پیش رفت ایران تے امارات دے تعلقات وچ اک وڈی تبدیلی ول اشارہ کردی اے کیونکہ جنگ دے دوران ایرانی حملیاں پاروں امارات وچ کاروباری سرگرمیاں متاثر ہوئیاں سن تے غیر ملکی لوکاں دی نقل مکانی وی ویکھی گئی سی۔
ذرائع نے دسیا کہ ایس معاہدے نال امریکا تے ایران دے وچکار جھیڑے (تنازعے) دے حل وچ مدد مل سکدی اے کیونکہ ایس طریقے نال ایران جنگی نقصاناں دے ازالے دا دعویٰ کر سکدا اے، جڈوں کہ امریکا ایہ مؤقف اپنا سکدا اے کہ اوہنے کوئی ادائیگی نہیں کیتی۔
ذرائع دے مطابق ایران نے گھٹ توں گھٹ 2 دوجے خلیجی ملکاں نال وی ایس طرح دے انتظام لئی رابطہ کیتا اے۔
واضح رہے کہ ایران ولوں متحدہ عرب امارات تے آخری سدھا (براہِ راست) حملہ 4 مئی نوں خلیج عمان وچ واقع فجیرہ بندرگاہ تے کیتا گیا سی۔
