معاہدے دا مطلب ایہہ نہیں کہ امریکی تے اسرائیلی جُرماں نوں بھل جاواں گے یا معاف کر دیاں گے، ایران
ترجمان ایرانی وزارتِ خارجہ اسماعیل بقائی نے آکھیا اے کہ ایرانی عوام تے اسرائیلی تے امریکی ظلماں نوں نہیں بھلاں گے، معاہدے دا مطلب ایہہ نہیں اے کہ اسیں جُرماں نوں معاف کر دیاں گے یا بھل جاواں گے۔
تہران وچ پریس بریفنگ دوران اسماعیل بقائی دا آکھنا سی کہ ایران تے امریکا وچکار مفاہمتی یادداشت (ایم او یو) تے دستخط دا میکنزم اج یا بھلکے (کل) فائنل کیتا جائے گا، فیر ایس دا اعلان ہووے گا۔ ایم او یو تے دستخط جمعے نوں جنیوا وچ ہون گے۔ جنیوا وچ دستخط دی تقریب توں پہلاں ایرانی حکام گوانڈھی ملکاں دے دورے کرن گے۔ جنگ لبنان سمیت سارے محاذوں تے ختم ہونی چاہیدی اے، لبنان دی خودمختاری دا آدر (احترام) کیتا جائے، لبنان دے خلاف جارحیت دا خاتمہ، اوہدی خود مختاری تے علاقائی سالمیت دا احترام وی مفاہمتی یادداشت دا بنیادی حصہ اے۔
ترجمان ایرانی وزارتِ خارجہ دا کہنا سی کہ ایران، عمان تے دوجے ملکاں نال رل کے آبنائے ہرمز نوں محفوظ لنگھگاہ (گزرگاہ) بناؤن لئی قدم چُکے گا، میری ٹائم سروس فیس وصول کیتی جائے گی، ایہہ اک خاص مدت لئی ہووے گا تے امریکا دی اپنی ذمہ داریاں تے وعدیاں دے مطابق ہووے گا۔
اوہناں دا آکھنا سی کہ معاہدے دے تحت امریکا نے ہرجانے دی ادائیگی تے منجمد کیتے گئے اثاثے بحال کرن دا وعدہ کیتا اے، امریکا معاہدے دے تحت اپنے وعدے پورے کرن دا پابند اے۔ امریکا نوں ایران دے منجمد اثاثے دینے ہن، امریکا اپنا کوئی پیسہ ایران نوں نہیں دیوے گا، منجمد اثاثیاں تے ایران دا حق اے۔ ایران نوں اپنا تیل تے پیٹروکیمیکل باہرلے ملکاں نوں گھلّن (برآمد کرن) دی وی اجازت ہونی چاہیدی اے، جے امریکا وعدے پورے کرن وچ ناکام ہویا تاں اوہنوں جوابی کارروائی دا سامنا کرنا پئے گا۔
اسماعیل بقائی دا کہنا سی کہ امریکا نے افزودہ یورینیم ایران توں کڈھن دی اک وار کوشش کر لئی اے تے اوہدا نتیجہ وی دیکھ لیا اے، معاہدے دا مطلب ایہہ نہیں اے کہ اسیں جُرماں نوں معاف کر دیاں گے یا بھل جاواں گے۔ اسیں ایرانی عوام تے اسرائیلی تے امریکی ظلماں نوں نہیں بھلاں گے، اسیں ایہہ نہیں بھلاں گے کہ اسیں وڈی گنتی وچ اپنی قیادت کھوئی، ایرانی عوام اپنی قیادت نال کھلوتے رہے۔ عالمی ادارے ایران تے امریکا تے صیہونی جارحیت دی مذمت کرن وچ ناکام رہے، امریکی حکومت نوں ایرانی عوام دا بھروسہ مڑ توں حاصل کرن لئی اک لمی واٹ (طویل سفر) طے کرنی پئے گی۔
