ایران امریکہ سمجھوتہ، عالمی منڈی وچ خام تیل دیاں قیمتاں 4 فیصد ڈگ گئیاں
ایران تے امریکہ وچکار سمجھوتہ طے پاون توں بعد عالمی منڈی وچ خام تیل دیاں قیمتاں 4 فیصد ڈگ گئیاں۔
عالمی مارکیٹ وچ برطانوی خام تیل دی قیمت وچ 4 ڈالر دی کمی ہوئی جس توں بعد برطانوی خام تیل دی نویں قیمت 83.70 ڈالر فی بیرل ہو گئی۔ امریکی خام تیل دی قیمت وی 3.75 ڈالر کمی توں بعد 80.76 ڈالر فی بیرل ہو گئی۔
یاد رہے کہ امریکہ ایران وچکار سمجھوتہ طے پا گیا اے، وزیراعظم شہباز شریف نے امریکہ تے ایران وچکار امن سمجھوتے دا اعلان کیتا۔
وزیراعظم شہباز شریف نے سوشل میڈیا تے جاری پیغام وچ آکھیا کہ امن سمجھوتے تے دستخط دی باضابطہ تقریب 19 جون نوں سوئٹزرلینڈ وچ ہووے گی۔
وزیراعظم نے سمجھوتے لئی قطر، سعودی عرب تے ترکیے دے کردار نوں سراہندے ہوئے آکھیا کہ فریقین نے سارے محاذوں تے فوجی کارروائیاں فوراً تے مستقل طور تے ختم کرن دا اعلان کیتا، سمجھوتے وچ لبنان سمیت سارے محاذوں تے کارروائیاں روکنا شامل اے۔
امریکہ تے ایران نے وی سمجھوتہ طے پاون دی تصدیق کر دتی اے۔
