آخر ٹی وی دے ریموٹ کنٹرول وچ بہت زیادہ بٹن کیوں ہوندے نیں جیہڑے کدی استعمال وی نہیں ہوندے؟
تسیں 20 سال پرانے ٹیلی ویژن (ٹی وی) ریموٹ نوں دیکھو تے پھر اوہدا موازنہ موجودہ عہد دے کسے ریموٹ نال کرو۔
تاں چند معمولی تبدیلیاں توں ہٹ کے دوہاں وچ کوئی فرق نظر نہیں آئے گا۔
درحقیقت ایس عرصے وچ ریموٹ کنٹرولز وچ کوئی خاص فرق نہیں آیا، مزید ایہہ کہ اوہناں وچ زیادہ تر بٹن ایسے ہوندے نیں جیہڑے کسے کم دے نہیں ہوندے، تاں اوہ کیوں اوہدا حصہ ہوندے نیں؟
ایہدیاں وجوہات کافی دلچسپ نیں۔
تسیں ٹی وی لینا چاہندے ہو یا کوئی وی الیکٹرونک ڈیوائس، لوگ ہمیشہ ایسے فیچرز نال لیس ڈیوائسز لینا چاہندے نیں جیہڑیاں زیادہ شاہانہ محسوس ہون۔
ایہدے الٹ اک ریموٹ کنٹرول گھٹ بٹناں دے نال بہت سستا محسوس ہووے گا۔
تاں کمپنیاں ولوں ایس خیال نوں مدنظر رکھیا گیا تے پراسرار رینبو بٹناں دا اضافہ کر دتا گیا جیہدے توں تہانوں لگے کہ پیسے ضائع نہیں ہوئے۔
زیادہ دلچسپ گل ایہہ اے کہ زیادہ تر لوکاں نوں ریموٹ کنٹرول دے بٹناں وچ کوئی خاص دلچسپی نہیں ہوندی، کیونکہ اوہ بس مخصوص بٹناں نوں ہی استعمال کردے نیں۔
اک ہور وجہ کمپنیاں ولوں ریموٹ دی تیاری دے خرچے (لاگت) نوں مستحکم رکھنا اے۔
ہن جے کوئی کمپنی گھٹ بٹناں والا ریموٹ کنٹرول تیار کرنا چاہے گی تاں اوہدے لئی پلاسٹک کیسنگ دا نواں سانچا تیار کرن دی لوڑ ہووے گی جدکہ اک مختلف سرکٹ بورڈ چاہیدا ہووے گا۔
ایسے طرح ریموٹ کنٹرول ٹھیک کام کرے گا یا نہیں، اوہدے لئی نویں ٹیسٹ کرنے ہون گے۔
تاں ایس اضافی خرچے تے سردردی توں زیادہ اسان ایہہ اے کہ پہلاں توں موجود ریموٹ کنٹرول سانچے نوں استعمال کیتا جائے جیہڑا کہ ہر طرح دے ٹی وی تے کام کردا اے۔
اوہدا نتیجہ ایہہ نکلیا کہ اک ریموٹ کنٹرول کسے جہاز دے کاک پٹ ورگا بن گیا اے، جیہدے وچ بہت گھٹ بٹناں دی لوڑ ہوندی اے پر مجموعی طور تے 50 یا اوہدوں توں ودھ بٹن ریموٹ دا حصہ ہوندے نیں، جنہاں وچوں زیادہ تر بس نمائشی ہوندے نیں۔
اک ہور دلچسپ وجہ ریموٹ کنٹرول دا ڈارک ڈیزائن اے۔
اکثر لوک ریموٹ کنٹرول نوں ہنھیرے (تاریکی) وچ استعمال کردے نیں تے دیکھن دی بجائے چھوہ (لمس) تے انحصار کیتا جاندا اے۔
تاں زیادہ تر لوک ریموٹ کنٹرولز دے بٹناں دے ڈیزائن توں چنگی طرح واقف ہوندے نیں تے اوہنوں دیکھے بغیر وی استعمال کر سکدے نیں تے اوہناں نوں صحیح بٹن لبھن دی لوڑ نہیں ہوندی۔
