کورونا وائرس: خیبر پختونخوا دے 9علاقیاں وچ سمارٹ لاک ڈاؤن نافذ

پشاور: خیبر پختونخوا وچ کورونا وائرس نال حالات ہور خراب ہو گئے، 3دناں دے دوران 9علاقیاں وچ سمارٹ لاک ڈاؤن نافذ کر دتا گیا، ایبٹ آباد، سوات، نوشہرہ، مردان، چترال تے ملاکنڈ دوجے علاقیاں وچ وی لاک ڈاؤن نافذ اے، پشاور دے وکھو وکھ علاقیاں وچ احکامات تے پورا عملدرآمد نہ ہو سکیا۔ خیبر پختونخوا وچ کورونا دے کیساں دی ودھدی ہوئی تعداد دے پیش نظر وکھو وکھ ضلعیاں وچ سمارٹ لاک ڈاؤن دے نفاذ دا سلسلہ جاری اے، متعلقہ علاقیاں نوں خاردار تاراں لا کے تے سیل کر دتا گیا پر مکمل طور تے عملدرآمد نہ ہو سکیا۔ پشاور وچ اشرفیہ کالونی، یونیورسٹی ٹاؤن وچ چنار روڈ، دانش آباد، حیات آباد دے دو فیز، آسیہ تے شنواری ٹاؤن وچ سمارٹ لاک ڈاؤن لایا گیا اے، متعلقہ علاقیاں وچ مین روڈ نوں ہر قسم دی آمدورفت لئی بند کیتا گیا اے پر پچھلے راہواں نوں نظر انداز کر دتا گیا اے۔ سمارٹ لاک ڈاؤن دے حوالے نال جتھے شہریاں نے حکومتی اقدامات نوں سراہیا تے اوتھے متعلقہ علاقیاں دے دکانداراں دا کہنا اے لاک ڈاؤن دے دوران کاروباری مراکز نوں کھلا رکھن دی اجازت دتی جائے۔ اپر چترال دی 3وادیاں، ایبٹ آباد دے 6علاقیاں، نوشہرہ دے 15، مردان دے 5، خیبر دے 3، سوات وچ 11تے بٹگرام دے 7علاقیاں نوں وی سمارٹ لاک ڈاؤن دے تحت سیل کیتا گیا اے۔