پاکستان تے روس دا علاقائی تناظر وچ قریبی تعاون نوں فروغ دین تے اتفاق
اسلام آباد: سرکاری میڈیا دے مطابق پاکستان تے روس نے علاقائی تناظر وچ اہم دوطرفہ ایجنڈے تے قریبی تعاون نوں فروغ دین تے اتفاق کیتا اے۔ روس دے وزیر خارجہ سرگئی لیوروف دے نال ٹیلی فون تے گل بات وچ وزیر خارجہ شاہ محمود قریشی نے زور دتا پاکستان روس نوں اک اہم شراکت دار سمجھدا اے تے ایہدے طویل مدتی تے کثیر جہتی شراکت داری نوں اگے ودھانا چاہندا اے۔ دوواں وزرائے خارجہ نے کورونا وائرس دی عالمی وباء، کثیر جہتی امور تے تعاون دوطرفہ تعاون وچ وادھے دے پہلوواں تے علاقائی امور سنے باہمی دلچسپی دے امور تے تبادلہ خیال کیتا۔ شاہ محمود قریشی نے کورونا وائرس دی وجہ توں روس وچ قیمتی جاناں دے ضیاع تے تعزیت کیتی۔ وزیر خارجہ نے روسی ہم منصب نوں وزیراعظم عمران خان دی ترقی پذیر ملکاں لئی قرضیاں دی ادائیگی وچ سہولت لئی عالمی اقدام بارے اپیل توں آگاہ کیتا۔ روسی وزیر خارجہ نے قرضیاں دی ادائیگی وچ سہولت دی حمایت کردیاں ایس حوالے نال مثبت کردار ادا کرن دا یقین دوایا۔مقبوضہ کشمیر دے حوالے نال شاہ محمود قریشی نے بھارتی فوج ولوں جاری دوہرے لاک ڈاؤن، پرتشدد فوجی کارروائیاں تے مقبوضہ وادی وچ آبادی دا تناسب تبدیل کرن دی سازشاں تے گہری تشویش ظاہر کیتی۔ اوہناں نے ایس سنگین صورتحال نوں ختم کرن لئی فوری اقدامات دی اہمیت تے زور دتا۔ دوواں وزرائے خارجہ نے حالیہ مثبت پیشرفت دے تناظر وچ افغانستان دی صورتحال تے وی تبادلہ خیال کیتا۔
