آڈیو لیک کیس وچ علی امین گنڈاپور دے وارنٹ گرفتاری منسوخ

اسلام آباد: سیشن عدالت نے آڈیو لیک کیس وچ سابق وزیراعلیٰ خیبر پختونخوا علی امین گنڈاپور دے وارنٹ منسوخ کر دتے۔

اسلام آباد دے ڈسٹرکٹ اینڈ سیشن جج جاوید اقبال سپرا نے علی امین گنڈاپور دے خلاف آڈیو لیک کیس وچ جاری وارنٹ بارے سماعت کیتی۔

سماعت دے دوران وکیل صفائی نے آکھیا کہ صرف اک سماعت تے پیش نہ ہون پاروں علی امین گنڈاپور دے ناقابلِ ضمانت وارنٹ گرفتاری جاری کیتے گئے، علی امین نے عدالت دے ساہمنے سرنڈر کر دتا اے تے اوہ عدالت دے رحم و کرم تے نیں۔

وکیل صفائی نے وارنٹ منسوخی دی استدعا کردے ہوئے آکھیا کہ جیہڑی عدالت وارنٹ گرفتاری جاری کر سکدی اے، اوہ اوہناں نوں منسوخ بھی کر سکدی اے۔

مگروں عدالت نے علی امین گنڈاپور دے آڈیو لیک کیس وچ وارنٹ منسوخ کر دتے تے کیس دی ہور سماعت 15 جولائی تیکر ملتوی کر دتی۔