رکن اسمبلی خواجہ داؤد سلیمان دے الزامات بے بنیاد نیں: فیاض الحسن چوہان
لہور: وزیر اطلاعات پنجاب فیاض الحسن چوہان دا کہنا اے رکن اسمبلی خواجہ داؤد سلیمانی دے الزامات بے بنیاد نیں، وزیراعلیٰ پنجاب سب نوں نال لے کے چلن دی پالیسی تے گامزن نیں، خواجہ داؤد سلیمانی دے حلقے وچ 49سکیماں دا آغاز کیتا گیا۔ فیاض الحسن چوہان نے آکھیا وزیراعلیٰ اتحادی جماعتاں دے اراکین دے نال اک ٹیم دی طرح کم کر رہے نیں، اوہناں دا اپنی پارٹی دے رکن اسمبلی نال اختلاف دا سوال ای پیدا نہیں ہوندا، عثمان بزدار پنجاب دے اوہ وزیراعلیٰ نیں جہڑے صوبائی اسمبلی دے اک اک رکن نوں اوہدے ناں توں جاندے نیں، ایس توں پہلاں ایتھے 10سال حکومت کرن والے اپنے اراکین اسمبلی نوں نہ جاندے، نہ پہچاندے سن۔ وزیر اطلاعات پنجاب نے ہور آکھیا خواجہ داؤد سلیمان نے جہڑے پارلیمنٹرینز دا ذکر کیتا اے، اوہ وزیراعلیٰ پنجاب نال ملاقات کر چکے، ایہناں اراکین اسمبلی نے سردار عثمان بزدار دی لیڈر شپ تے پورا اعتماد دا اظہار کیتا اے، نہ ای وزیراعلیٰ دا کسے ممبر نال تے نہ ای کسے وی ممبر دا وزیراعلیٰ نال کسے قسم دا اختلاف اے، بھرپور انداز وچ کم جاری اے تے ایہناں سکیماں تے سال 2019، 20وچ 60کروڑ روپے خرچ وی کیتے جا چکے نیں۔
