رانا ثناء اللہ نال روسی سفیر دی ملاقات، دوطرفہ تعاون ودھاؤن اُتے اتفاق
اسلام آباد: وزیراعظم دے مشیر برائے سیاسی امور رانا ثناء اللہ نال پاکستان وچ تعینات روسی سفیر البرٹ خوریف نے ملاقات کیتی جیہدے وچ دوہاں ملکاں دے درمیان کھیڈاں سمیت مختلف شعبیاں وچ دوطرفہ تعاون نوں مزید فروغ دین اُتے تبادلہ خیال کیتا گیا۔
ملاقات دے دوران ایس گل اُتے اتفاق کیتا گیا کہ پاکستان تے روس دے درمیان کھیڈاں متعلق موجود مفاہمتی یادداشتاں ایم او یوز (MoUs) اُتے عملدرآمد نوں تیز کیتا جاوے گا، رانا ثناء اللہ نے آکھیا کہ دوہاں ملکاں دے درمیان بالخصوص فٹ بال دے شعبے وچ تعاون نوں ترجیحی بنیاداں اُتے اگے ودھایا جاوے گا۔
رانا ثناء اللہ نے ایس موقعے اُتے آکھیا کہ روس دے روایتی تے مقبول کھیڈاں دے فروغ لئی وی دوہاں ملکاں دے درمیان تعاون نوں مزید وسعت دتی جاوے گی۔
وفاقی وزیر نے روس نوں کھیڈاں دے شعبے وچ وڈے تجربے تے مضبوط صلاحیتاں دا حامل ملک قرار دیاں ہویاں آکھیا کہ تعلیم، ثقافت، معیشت تے کھیڈ دوہاں ملکاں نوں اک دوجے دے مزید قریب لے آؤن وچ اہم کردار ادا کر سکدے نیں۔
روسی سفیر البرٹ خوریف نے آکھیا کہ روس وچ کرکٹ دے فروغ لئی پاکستان دے تجربات تے مہارت توں بھرپور فائدہ چکیا جاوے گا۔
روسی سفیر نے امریکہ تے ایران دے درمیان امن و استحکام لئی پاکستان دیاں کوششاں نوں قابلِ تحسین قرار دتا، ملاقات دے اختتام اُتے دوہاں فریقاں نے ایس عزم دا اظہار کیتا کہ پاکستان تے روس دے درمیان مختلف شعبیاں وچ تعاون دا دائرہ مزید وسیع کرن لئی سانجھیاں کوششاں جاری رکھیاں جان گیاں۔
