غیر قانونی بھرتی کیس وچ پرویز الٰہی تے محمد خان بھٹی توں جواب طلب
اسلام آباد: سپریم کورٹ نے غیر قانونی بھرتیاں متعلق کیس وچ پرویز الٰہی تے محمد خان بھٹی نوں نوٹس جاری کردیاں ہویاں جواب طلب کر لیا اے۔
عدالتِ عظمیٰ نے ٹرائل کورٹ توں کیس دی پیش رفت دی رپورٹ وی طلب کر لی اے جدکہ عدالت نے ایسے کیس دے شریک ملزم رائے ممتاز دی عبوری ضمانت منظور کر لی اے۔
ڈپٹی پراسیکیوٹر پنجاب نے عدالت نوں دَسیا کہ پرویز الٰہی تے محمد خان بھٹی ضمانت توں بعد مبینہ طور اُتے ضمانت دا غلط استعمال کر رہے نیں تے کئی وار عدالتی سماعتیاں توں غیر حاضر رہے نیں۔
اوہناں نے مؤقف اختیار کیتا کہ دوویں ملزم 18 وار عدالت وچ پیش نہیں ہوئے، جیہدے پاروں ٹرائل دا کم تاخیر دا شکار ہو رہا اے، عدالت نوں مزید دَسیا گیا کہ مسلسل غیر حاضری پاروں کیس دی کارروائی متاثر ہو رہی اے۔
بعدوں سپریم کورٹ نے پرویز الٰہی تے محمد خان بھٹی نوں نوٹس جاری کردیاں ہویاں اوہناں توں وضاحت طلب کر لی۔
