مریم نواز دا تعصب تے اشتعال انگیزی دے خلاف سانجھا لائحہ عمل اپنان تے زور

لاہور: وزیراعلیٰ پنجاب مریم نواز شریف نے تعصب تے اشتعال انگیزی دے خلاف سانجھا لائحہ عمل اپنان تے زور دتا اے۔
نفرت انگیز تقاریر دے انسداد دے عالمی دہاڑے تے اپنے پیغام وچ وزیراعلیٰ پنجاب مریم نواز شریف نے نوجواناں توں سوشل میڈیا تے بڑھدے ہوئے نفرت انگیز مواد، غلط معلومات تے انتہاپسندی دے رجحانات نوں روکن دی اپیل کیتی۔
اوہناں نے معاشرے توں نفرت، تعصب تے تنگ نظری دے خاتمے لئی رل کے کم کرن دے عزم دا اعادہ کیتا۔
اوہناں دا کہنا سی کہ ماہِ محرم الحرام وچ نفرت انگیز تقاریر دی بجائے امن، محبت تے بھائی چارے دے درس نوں عام کرن دی لوڑ اے، سوشل میڈیا تے ڈیجیٹل پلیٹ فارمز دے راہیں نفرت انگیز مواد دی تیز رفتار ترسیل نوں روکنا اج دے دور دا سب توں وڈا چیلنج اے۔
مریم نواز نے آکھیا کہ نفرت انگیز تقاریر انسانی حقوق لئی سنگین خطرہ نیں، جو تشدد تے سماجی تقسیم دا باعث بندیاں نیں، نفرت انگیز بیانیے مسترد کر کے معاشرے وچ برداشت، امن تے باہمی احترام نوں فروغ دینا ویلے دی اہم لوڑ اے۔
اوہناں دا کہنا سی کہ نفرت نوں ایس دی تمام شکلاں تے مظاہر وچ مذہبی، نسلی، صنفی بنیاد تے یا قومی سطح تے روکنا عالمی ہم آہنگی دی کلید اے، نفرت، تعصب تے تنگ نظری نوں ہر محاذ تے شکست دینی ہوئے گی، نفرت انگیز تقاریر معاشرے وچ تقسیم، انتشار تے تشدد دا باعث بندیاں نیں-
وزیراعلیٰ پنجاب نے مزید آکھیا کہ مذہبی، نسلی تے صنفی بنیاداں تے نفرت روکنا عالمی ہم آہنگی دی بنیادی کنجی اے، اسلاموفوبیا نفرت انگیز روییاں دی سب توں خطرناک شکل اے، کسے نوں دلاں وچ نفرت دے بیج بیجن دی اجازت نہیں، آزادیِ اظہار دے ناں تے نفرت پھیلان والیاں دا محاسبہ ناگزیر اے۔