گورو ارجن دیو جی دے شہیدی دیہاڑے دیاں تقریباں مک گئیاں، بھارتی سکھ یاتری واپس روانہ
لاہور:
سکھ مذہب دے چھیویں گورو ارجن دیو جی دے شہیدی دیہاڑے (جوڑ میلہ) دیاں مذہبی تقریباں ختم ہون توں بعد بھارتی سکھ یاتری واہگہ بارڈر راہیں اپنے دیس واپس روانہ ہو گئے۔
یاتریان دی واپسی دے موقعے تے متروکہ وقف املاک بورڈ ولوں واہگہ بارڈر تے خاص انتظام کیتے گئے سن تاکہ امیگریشن تے سفر دے سارے مرحلے سوکھے طریقے نال پورے کیتے جا سکن۔ واہگہ چیک پوسٹ تے صوبائی وزیر رمیش سنگھ اروڑہ نے سکھ یاتریوں نوں الوداع آکھیا۔
ایس موقعے تے چیئرمین متروکہ وقف املاک بورڈ قمر الزمان تے ایڈیشنل سیکرٹری شرائنز ناصر مشتاق وی اوتھے موجود سن۔ متروکہ وقف املاک بورڈ ولوں یاتریوں لئی میڈیکل دیاں سہولتاں تے کرنسی ایکسچینج سمیت دوجے ضروری انتظام کیتے گئے سن۔
واپسی دے موقعے تے سکھ یاتریوں نے پاکستان وچ رہن دے دوران ملن والیاں سہولتاں تے مہمان نوازی نوں بہت سراہیا تے سارے انتظاماں تے تسلی دا اظہار کیتا۔ اوہناں نے اپنی مذہبی رسماں دی ادائیگی لئی دتیاں گئیاں سہولتاں تے متعلقہ اداریاں دا شکریہ وی ادا کیتا۔
