امریکہ ایران معاہدے تے تنقید، جے ڈی وینس نے اسرائیلی حکومت نوں شیشہ دکھا دتا

واشنگٹن:

امریکی نائب صدر جے ڈی وینس نے امریکہ ایران معاہدے تے تنقید کرن والی اسرائیلی حکومت نوں شیشہ دکھا دتا اے۔ پریس کانفرنس کردیاں ہویاں جے ڈی وینس نے آکھیا کہ نیتن یاہو دی کابینہ دے کجھ ارکان نے ڈیل تے تنقید کیتی اے تے کجھ نے تاں صدر ٹرمپ تے ذاتی حملے شروع کر دتے نیں۔

اوہناں چیتے کروایا کہ اسرائیل زیادہ تر ہتھیار واشنگٹن توں ای لیندا اے، اسرائیل دا صرف پچھلے 3 مہینیاں دے دوران بچاؤ کرن والے دو تہائی ہتھیار امریکیاں دے ہتھوں تیار ہوئے سن، ایہناں ہتھیاراں دی قیمت امریکیاں دے ٹیکس توں ادا کیتی گئی۔

جے ڈی وینس نے آکھیا کہ اسرائیل وچ کوئی وی بندہ جیہڑا ایہ سمجھدا اے کہ اوہدا وڈا مسئلہ امریکی صدر اے، تاں اوہ خوابِ غفلت توں جاگے تے سچائی نوں جانے۔

اسرائیل دے سکیورٹی تے فنانس منسٹر نوں کھری کھری سنادیاں ہویاں جے ڈی وینس نے آکھیا کہ تسی لوگ تشدد دا راہ اپنا کے قومی سلامتی دے مسئلیاں نال نمٹ نہیں سکدے۔

یاد رہے کہ ایس توں پہلے وی امریکی نائب صدر نے لبنان تے اسرائیلی حملیاں نوں تنقید دا نشانہ ہنڈیاں آکھیا سی کہ شہری علاقیاں تے حملے قبول نہیں کیتے جا سکدے، اسرائیل نوں امن معاہدے دا آدر (احترام) کرنا ہوئے گا۔