“وزیراعظم دا پٹرول 74، ڈیزل دی قیمت وچ 67 روپے فی لٹر کمی دا اعلان”
اسلام آباد: وزیراعظم محمد شہباز شریف نے عوام لئی وڈے ریلیف دا اعلان کردیاں ہویاں پٹرول دی قیمت وچ 74 روپے تے ہائی سپیڈ ڈیزل دی قیمت وچ 67 روپے فی لٹر کمی دا اعلان کر دتا اے۔
وزیراعظم دے مطابق پٹرول دی فی لٹر قیمت 373 روپے توں گھٹ ہو کے 299 روپے جدوں کہ ڈیزل دی قیمت 378 روپے توں گھٹ ہو کے 311 روپے فی لٹر ہو جاوے گی۔
اپنے بیان وچ وزیراعظم شہباز شریف نے آکھیا کہ خطے وچ معاشی صورتحال وچ بہتری تے عالمی منڈی وچ تیل دیاں قیمتاں وچ کمی دا پورا فائدہ فوری طور اُتے عوام تیکر پہنچایا جا رہیا اے۔ اوہناں آکھیا کہ قوم نال کیتا گیا وعدہ پورا کرن جا رہے آں تے عوام نوں زیادہ توں زیادہ ریلیف دینا حکومت دی سب توں پہلی ترجیح اے۔
وزیراعظم نے آکھیا کہ حکومت نوں عوام دیاں مشکلاں دا پورا احساس اے تے اوکھے حالات وچ صبر دکھان اُتے اسیں عوام دے شکر گزار آں۔ اوہناں دا کہنا سی کہ بحران دے دوران وفاقی حکومت نے ترقیاتی بجٹ تے کفایت شعاری (بچت) توں حاصل ہون والے پیسیاں وچوں 129 ارب روپے استعمال کر کے عوام نوں جِنّی ہو سکے ریلیف فراہم کیتی۔
شہباز شریف نے آکھیا کہ خطے وچ معاشی دباؤ دے باوجود پاکستان وچ توانائی دا بحران پیدا نہیں ہویا، نہ کتنے ایندھن (پٹرول ڈیزل) دی تنگی ہوئی، نہ لمیاں لائناں لگیاں تے نہ ہی فیول راشننگ دی لوڑ پئی، اوہناں نے ایہدا کریڈٹ بہتر منصوبہ بندی تے اثر دار حکومتی اقدامات نوں دتا۔ اوہناں آکھیا کہ وفاق تے صوبیاں دے آپسی تعاون نال ملکی معیشت نوں پکا رکھن وچ مدد ملی، جیہدے اُتے اوہ سارے وزرائے اعلیٰ دے شکر گزار نیں، اوہناں نے ایس عزم دا بھی اظہار کیتا کہ مہنگائی نوں ہور گھٹ کرن تے معاشی استحکام لئی پکے اقدامات دا سلسلہ جاری رکھیا جاوے گا۔
وزیراعظم نے مشرقِ وسطیٰ دی کشیدہ صورتحال وچ امن قائم ہون نوں پاکستان دی سفارتی کامیابی قرار دیندیاں ہویاں آکھیا کہ پاکستان دی ثالثی (وچولے دا کردار) دے نتیجے وچ ‘اسلام آباد مفاہمتی یادداشت’ اُتے دستخط ہوئے جیہڑی اک تریخی دستاویز اے، اوہناں آکھیا کہ ایہ کامیابی پوری پاکستانی قوم لئی فخر دی گل اے۔
شہباز شریف نے فیلڈ مارشل سید عاصم منیر، نائب وزیراعظم تے وزیر خارجہ سینیٹر اسحاق ڈار، وزیر داخلہ سید محسن رضا نقوی تے امن دیاں کوششاں وچ شامل حکومتی ٹیم دی خدمات نوں سراہیا۔ اوہناں نے معاشی ٹیم، وزیر خزانہ محمد اورنگزیب، وزیر منصوبہ بندی احسن اقبال، وزیر اقتصادی امور احد خان چیمہ، وزیر پیٹرولیم علی پرویز ملک تے دوجے متعلقہ افسران دی کوششاں نوں بھی خراجِ تحسین پیش کیتا۔
