بنوں دے نیم قبائلی علاقے چ اک توں بعد دوجا دھماکہ، 7 بندے جاں بحق۔
بنوں: بنوں دے نیم قبائلی علاقے برغنتو چ اک توں بعد دوجا دھماکہ ہویا اے، جیہدے نتیجے چ 7 بندے جاں بحق تے 3 زخمی ہو گئے نیں۔
ڈی پی او یاسر آفریدی نے دَسیا اے کہ تھانہ احمد زائی دی حدود چ پہلا دھماکہ سواریاں نال بھری ڈاٹسن گڈی دے نیڑے ہویا، تے جِتھے دھماکہ ہویا سی اوتھے امدادی کماں دے دوران ای دوجا دھماکہ وی ہو گیا۔ اوہناں دَسیا کہ ڈاٹسن چ ہاتھی خیل قوم دے لوک سوار سن۔ جاں بحق ہون والیاں نوں آر ایچ سی تے زخمیاں نوں کے جی این ہسپتال منتقل کر دِتا گیا اے، زخمیاں چ بچے وی شامل نیں۔
یاسر آفریدی نے ہور دَسیا کہ سکیورٹی ادارے موقعے تے اپڑ گئے نیں، ثبوت کٹھے کر کے سرچ آپریشن شروع کر دِتا گیا اے۔ سڑک کنارے لائے گئے آئی ای ڈی دھماکے دی زد چ تحصیلدار سب ڈویژن وزیر عابد اللہ دی گڈی وی آئی، جیہنوں نقصان پہنچیا، پر اوہ آپ محفوظ رہے۔
صدرِ مملکت آصف علی زرداری نے بنوں دھماکیاں تے ڈونگھے دکھ دا اظہار کردیاں آکھیا کہ دہشت گرد پاکستان دیاں عالمی سفارتی کامیابیاں تے امن دیاں کوششاں نوں خراب کرنا چاہندے نیں، پر پاکستان علاقائی تے عالمی امن دی حمایت جاری رکھے گا تے دہشت گرداں نوں ہرایا جائے گا۔
وزیر اعظم محمد شہباز شریف نے قیمتی جاناں دے ضیاع تے گہرے دکھ تے افسوس دا اظہار کیتا تے متعلقہ حکام نوں زخمیاں نوں ہر ممکن طبی سہولتاں دین تے واقعے دی فوری تحقیقات دی ہدایت کیتی۔ اوہناں آکھیا کہ دہشت گردی پاکستان دے امن تے استحکام دے خلاف اک کوجھی سازش اے، ایہو جیہاں بزدلانہ کارروائیاں قوم دے حوصلے نوں کدی وی توڑ نہیں سکدیاں۔ دہشت گرداں تے اوہناں دے سولت کاراں (مددگاراں) نوں قانون دے کٹہرے چ لیا کے سخت سزا دِتی جائے گی۔
