غزہ سنگین انسانی بحران دا شکار، سلامتی کونسل فوری قدم چُکے: پاکستان
نیویارک: اقوامِ متحدہ چ پاکستان دے پکے نمائندے عاصم افتخار احمد نے آکھیا اے کہ غزہ اجے وی سنگین انسانی بحران دا شکار اے، اوتھے دے شہری وڈیاں مشکلاں جھیل رہے نیں، سلامتی کونسل نوں فوراً قدم چکن چاہیدے نیں۔
سلامتی کونسل دے ہنگامی اجلاس نال خطاب کردیاں اوہناں آکھیا کہ جنگ بندی دی بار بار خلاف ورزی پاروں عام لوکاں دیاں خواریاں ہور ودھ گئیاں نیں، جدکہ غزہ چ انسانی بحران ہور سنگین ہوندا جا رہیا اے۔ غزہ چ لکھاں لوک بھکھ تے خوراک دی کمی دا شکار نیں، 10 لکھ توں ودھ بچے غذائی قلت، صحت تے پڑھائی توں محروم ہو چکے نیں۔
پاکستان دے پکے نمائندے نے آکھیا کہ فلسطین دے مسئلے تے انسانی بحراناں دے پکے حل دا اکو ای راہ اے کہ اسرائیلی قبضہ ختم کیتا جائے تے 1967ء توں پہلاں دیاں سراہداں (سرحدوں) دے مطابق اک آزاد تے خودمختار فلسطینی ریاست بنائی جائے، جیہدا دارالحکومت القدس الشریف ہووے۔ اوہناں آکھیا کہ ایہو ای اوہ طریقہ اے جیہدے تے پوری دنیا متفق اے، تے ساڈیاں ساریاں کوششاں دا رخ ایسے پاسے ہونا چاہیدا اے۔
اوہناں ہور آکھیا کہ سلامتی کونسل دی قرارداد 2803 تے پورا عمل ہونا چاہیدا اے، جیہدے نتیجے چ پکی جنگ بندی ہووے، بنا کسے رکاوٹ دے انسانی امداد اپڑے، بنا کسے شرط دے فوراََ دوبارہ تعمیر دا کم شروع کیتا جائے تے فلسطینی عوام نوں اوہناں دا حقِ خودارادیت دوان لئی اک پکے وقت دے مطابق سیاسی کم شروع کیتا جائے۔
پاکستانی سفیر نے آکھیا کہ مغربی کنارے (ویسٹ بینک) نوں وی پچھے نہیں چھڈیا جا سکدا، جتھے آبادکاراں دے بڑھدے ہوئے تشدد، زبردستی گھراں چوں کڈھن تے غیر قانونی اسرائیلی بستیاں دے لگاتار وادھے پاروں حالات خراب توں خراب تر ہوندے جا رہے نیں۔
عاصم افتخار نے زور دِتا کہ عالمی برادری رل کے کم کرے تے بنا کسے رکاوٹ دے امداد دی رسائی نوں یقینی بنائے، بین الاقوامی انسانی قانون تے سلامتی کونسل دیاں قرارداداں 2720 تے 2803 کے مطابق امدادی سامان تے لائیاں ساریاں پابندیاں ختم کیتیاں جاون، رفح سمیت ساریاں لنگھگاہواں (سرحدی گزرگاہیں) امداد، تجارتی سامان تے بیماراں نوں کڈھن لئی کھولیاں جاون تے اوہناں نوں چالو رکھیا جائے۔
اوہناں آکھیا کہ غزہ دا گھیرو (محاصرہ) برساں توں قبضے تے اجتماعی سزا دا ذریعہ بنیا ہویا اے، آون جان تے روک لا کے قابض طاقت 21 لکھ فلسطینیاں دیاں مشکلاں ودھا رہی اے، ایہ گھیرو بین الاقوامی قانون تے چوتھے جنیوا کنونشن دی کھلی خلاف ورزی اے۔ انسانی امداد نوں کدی وی ہتھیار دے طور تے ورتیا نہیں جانا چاہیدا، تے ایہ محاصرہ فوراً ختم ہونا چاہیدا اے۔
اوہناں سلامتی کونسل توں مطالبہ کیتا کہ انسانی امداد بنا کسے شرط دے ہونی چاہیدی اے، سیاسی کوششاں اپنی جگہ چلدیاں رہن پر امداد نوں سیاسی شرطاں یا مذاکرات نال نہ جوڑیا جائے، پورے غزہ چ امدادی کم اقوام متحدہ تے اوہدے اداریاں راہیں بنا کسے دخل اندازی دے چلنے چاہیدے نیں۔
اوہناں آکھیا کہ فنڈز دی وڈی کمی نوں فوراً پورا کیتا جائے، اقوام متحدہ دی 2026 دی ہنگامی اپیل نوں ہلے تک صرف 12 فیصد فنڈ مل سکے نیں، غزہ تعمیرِ نو و ترقی فنڈ (GRAD) دا بننا تے 17 ارب امریکی ڈالر دی امداد دے وعدے چنگی گل نیں، پر فنڈز دی اس کمی نوں پورا کرن لئی فوراً پیسے مہیا کرنا لازمی اے۔
