نعمان اعجاز دا شوبز دی کمائی تے تنقید کرن والے صارف نوں جواب۔
لاہور: (ویب ڈیسک) پاکستان دے منے پرمنے اداکار نعمان اعجاز نے حال ای چ شوبز دی کمائی نوں حرام آکھن تے ہون والی تنقید تے جواب دیندیاں، تنقید کرن والے نوں اپنے رویے تے غور کرن دی صلاح دِتی اے۔
نعمان اعجاز، جیہڑے اپنی بے باک گلاں تے سماجی معاملیاں تے کھل کے بولن پاروں مشہور نیں، نے حال ای چ اک یوٹیوب ویڈیو چ اپنے دوست ولوں گھلیا گیا اک فکر انگیز میسج شیئر کیتا۔
اوہناں آکھیا کہ اللہ تعالیٰ نے انسان نوں اپنی تخلیق چ بہت ساریاں چیزاں دی پچھان قدرتی طور تے دِتی اے، پر حلال تے حرام چ تمیز دا اختیار انسان دے ضمیر تے مرضی تے چھڈ دِتا اے۔ اداکار نے سوال چکیا کہ جے انسان حلال تے حرام دا فرق جاندا اے، تے فیر اوہ حرام کماں تے حرام روزی توں کیوں نہیں بچدا؟
نعمان اعجاز دی اس گفتگو نوں سوشل میڈیا تے کئی لوکاں نے پسند کیتا، پر اک سوشل میڈیا یوزر نے اوہناں توں سوال پچھ لیا کہ کیہ شوبز توں ہون والی اوہناں دی اپنی کمائی حلال اے یا حرام؟
یوزر دے سوال دے جواب چ نعمان اعجاز نے چھوٹا جیہا پر سدھا تے کھرا جواب دیندیاں آکھیا، “تواڈی سوچ اک خاص قسم دی سوچ اے، خوش رہو بھائی تے کدی اپنے آپ تے وی نظر مار لیا کرو۔”
اداکار دے اس جواب توں بعد سوشل میڈیا تے وکھو وکھ گلاں سامنے آئیاں۔ کچھ لوکاں نے نعمان اعجاز دی حمایت کردیاں آکھیا کہ کسے وی پیشے دے حلال یا حرام ہون دا فیصلہ انجے ای نہیں کیتا جا سکدا، جدکہ کچھ لوکاں نے شوبز انڈسٹری نال جڑے مذہبی رولے نوں اک واری فیر چھیڑ دِتا۔
یاد رہے کہ نعمان اعجاز پاکستان دے وڈے اداکاراں چ گنے جاندے نیں تے کئی ہٹ ڈرامیاں چ اپنی شاندار اداکاری دے جوہر وکھا چکے نیں۔
