گلگت بلتستان وچ پی پی دا راہ ڈکن دی کوشِش کیتی جا رہی اے، معاملے آئین دے مطابق نہیں چل رہے: نیئر بخاری
رہنما پیپلز پارٹی نیئر حسین بخاری دا کہنا اے کہ گلگت بلتستان وچ ساڈا راہ ڈکن دی کوشِش کیتی جا رہی اے۔
نیئر بخاری نے آکھیا کہ پیپلز پارٹی کول آزاد امیدوار دی شمولیت توں بعد گلگت بلتستان وچ 12 سیٹاں ہو چُکیاں نیں جدکہ سپریم اپیلٹ بینچ نے پی پی دے دو کامیاب امیدواراں دا آرڈر معطل کر کے 2 جولائی دی تریخ دتی اے۔
اوہناں نے آکھیا کہ پوسٹل بیلٹ دی گنتی وچ جِتن والے پی پی امیدوار نوں قانونی تقاضے پورے کیتے بغیر ہرا کے مخالف نوں فارم 49 جاری کیتا گیا، الیکشن قوانین دے تحت پولنگ دے 14 دناں دے اندر آفیشل گزٹ جاری ہونا ضروری اے جیہڑا اجے تیکر نہیں ہویا، جدکہ آفیشل گزٹ جاری ہون توں پہلاں ای چیف الیکشن کمشنر نے آزاد امیدوار نوں آئی پی پی دا ممبر قبول کر کے پری میچور (ویلے توں پہلاں) فیصلہ کیتا۔
ایہ بھی پڑھو:
- الیکشن کمیشن نے گلگت بلتستان چُناؤ دے سرکاری نتائج دا اعلان کر دتا
- گلگت بلتستان وچ حکومت سازی تاخیر دا شکار، کامیاب مِمبراں دے گزٹ نوٹیفکیشن اجے تیکر جاری نہیں ہو سکے
پیپلز پارٹی دے رہنما نے آکھیا کہ گلگت بلتستان وچ معاملے آئین تے قانون دے مطابق نہیں چل رہے تے پی پی پی دا راہ ڈکن دی کوشِش کیتی جا رہی اے۔
نیئر بخاری نے آکھیا کہ پی پی پی کول مخصوص تے ٹیکنوکریٹ سیٹاں ملا کے 17 توں 19 سیٹاں دی واضع اکثریت بندی اے، انشاء اللہ گلگت بلتستان وچ پاکستان پیپلز پارٹی حکومت بنائے گی۔
اوہناں نے آکھیا کہ آئی پی پی دی قیادت نے پیپلز پارٹی نال ملاقات کر کے حکومت سازی وچ ساتھ دین دے بدلے وزارتاں منگیاں نیں، مسلم لیگ (ن) نال بھی گل بات ہوئی اے پر قیادت ای فیصلہ کرے گی کہ حکومت کیویں بنانی اے تے کس نوں اتحاد وچ شامل کرنا اے۔
