ریاست دے خلاف اکسان دی اجازت کسے وی حال وِچ نہیں دتی جا سکدی: کشمیری قیادت

مظفر آباد: سابق وزیراعظم آزاد کشمیر سردار عتیق نے آکھیا اے کہ ریاستِ پاکستان دے خلاف اکسایا جا رہا اے جِہدی کسے وی حال وِچ اجازت نہیں دتی جا سکدی، پاک فوج وِچ بغاوت دی گل کرن والیاں نوں سرعام پھانسی دتی جائے۔

آزاد کشمیر نال تعلق رکھن والے سیاسی رہنماواں نے آکھیا اے کہ کالعدم ایکشن کمیٹی عوامی حقوق دی آڑ وِچ کسے ہور ایجنڈے تے چل رہی اے، پر آزاد کشمیر تے پاکستان دے عوام دے وچکار پیار دے رشتے نوں مکایا نہیں جا سکدا، پاک فوج وِچ بغاوت دی گل کرن والیاں نوں سرعام پھانسی دتی جائے۔

سابق وزیراعظم آزاد کشمیر سردار عتیق، پاکستان مسلم لیگ (ن) آزاد کشمیر دے صدر شاہ غلام قادر، پاکستان پیپلز پارٹی آزاد کشمیر دی صدر نبیلہ ایوب تے ہوراں نے اسلام آباد وِچ پریس کانفرنس کردیاں ہویاں آزاد کشمیر دی ہُن دی صورتِ حال تے گل بات کیتی۔

سابق وزیراعظم سردار عتیق نے آکھیا کہ آزاد کشمیر دے لوک محبِ وطن نیں، پر کُجھ بندیاں ولوں اوہناں نوں ریاستِ پاکستان دے خلاف اکسایا جا رہا اے جِہدی کسے وی حال وِچ اجازت نہیں دتی جا سکدی، پاک فوج وِچ بغاوت دا مطالبہ کرن والیاں نوں سرعام پھانسی دتی جائے۔

اوہناں دا کہنا سی کہ ہُن دا تناء (کشیدگی) عوام وِچ بے چینی ودھاؤن دا کارن بن رہا اے، حکومتِ پاکستان نے ہر معاملے وِچ جیرے (صبر و تحمل) دا مظاہرہ کیتا، پر جرم کرن والے قانون دی پکڑ توں نہیں بچ سکدے، پاک فوج اپنے مضبوط ڈسپلن پاروں اِک منظم ادارہ اے تے کشمیری عوام نے پٹھیاں گلاں (انتشار) کھنڈاؤن والے ٹولے نوں رد کر دتا اے۔

سردار عتیق احمد نے آکھیا کہ کشمیریاں دا پاک فوج نال رشتہ کسے عہدے، منصب یا مراعات دا محتاج نہیں، بلکہ ایہ رشتہ قیامِ پاکستان توں بھی پہلاں دا قائم اے۔ پاکستان دے بڑے حساس علاقیاں دی ذمہ داری پاک فوج نے کشمیریاں تے بھروسہ کردیاں ہویاں اوہناں دے حوالے کر رکھی اے، جیہڑی اِس بھروسے دا وڈا ثبوت اے۔

اوہناں دا کہنا سی کہ اج پاکستان دیاں مسلح افواج حرمین شریفین دے دفاع وِچ وی اپنا کردار ادا کر رہیاں نیں، جیہڑی پوری قوم لئی وڈے مان دی گل اے۔ کُجھ لوک پاکستان دی معیشت نوں ماڑی (کمزور) کہندے نیں، پر سچ ایہ اے کہ ایہو معیشت اج دنیا دیاں وڈیاں طاقتاں نوں وی پاکستان دی اہمیت منن تے مجبور کر رہی اے۔

اوہناں سوال چُکیا کہ تریجی عالمی جنگ دے خطرے نوں ٹالن وِچ آخر کس ملک نے تگڑا کردار ادا کیتا، اِس سچائی نوں اکھوں اوہلے نہیں کیتا جا سکدا۔

99 فیصد کشمیری اج وی پاکستان دے نال کھڑے نیں: شاہ غلام قادر

اِس موقعے تے مسلم لیگ (ن) دے صدر شاہ غلام قادر نے آکھیا کہ حکومتِ پاکستان نے آزاد کشمیر دے عوام نوں پاکستان دے مقابلے وِچ سستا آٹا تے بجلی دتی۔

اوہناں آکھیا کہ کالعدم ایکشن کمیٹی رولا (انتشار) پاؤن دی کوشش کر رہی اے، جِہدی کسے وی حال وِچ اجازت نہیں دتی جا سکدی، ریاست دے 99 فیصد لوک اج وی پاکستان دے نال کھڑے نیں تے محبِ وطن نیں‌۔

شاہ غلام قادر دا کہنا سی کہ رولا پاؤن والے بندیاں نے ہسپتالاں تیکر نوں نشانہ بنایا، جدکہ پاک فوج وِچ ڈیوٹی کرن والے کشمیریاں نوں بغاوت تے اکسان دی گل کیتی، جیہڑا کہ بڑا ای مذمت جوگ کم اے۔

کُجھ گِنے چُنے لوک پاکستان دشمن ایجنڈے تے کم کر رہے نیں: نبیلہ ایوب

اِس موقعے تے پاکستان پیپلز پارٹی آزاد کشمیر نال تعلق رکھن والی خاتون رہنما نبیلہ ایوب نے آکھیا کہ پاک فوج دا جوان ساڈے ملک دیاں دیسی بلاں (سرحدوں) دا راکھا اے، بغاوت دا مطالبہ کرن والیاں نوں سمجھ جانا چاہیدا اے کہ ریاست کسے وی حال وِچ رِعایت نہیں کرے گی۔

اوہناں دا کہنا سی کہ کُجھ گِنے چُنے لوک پاکستان مخالف ایجنڈے تے کم کر رہے نیں، اِس توں کشمیری عوام دا کوئی لینا دینا نہیں، اوہناں نوں اپنے آپ نوں اِس توں وکھ (الگ) کر لینا چاہیدا اے۔

پریس کانفرنس دے دوران کالعدم ایکشن کمیٹی ولوں سکیورٹی اہلکاراں تے تشدد تے ریاست مخالف بیانیے دے بارے اِک ویڈیو وی چلائی گئی جِہدے وِچ سارے ثبوت پیش کیتے گئے کہ کس طرحاں پاکستان دے خلاف زہر اُگلیا جا رہا اے۔