محرم دے جلوساں تے مجالس لئی فول پروف سکیورٹی یقینی بنائی جائے: عظمیٰ بخاری
فیصل آباد: وزیر اطلاعات پنجاب عظمیٰ بخاری نے آکھیا اے کہ محرم دے جلوساں تے مجالس لئی فول پروف سکیورٹی یقینی بنائی جائے۔
صوبائی وزیر اطلاعات عظمیٰ بخاری دی صدارت ہیٹھ فیصل آباد ڈویژن دا اہم اجلاس ہویا جِہدے وِچ صوبائی وزیر بلال اکبر، کمشنر فیصل آباد، آر پی او، ڈی پی اوز تے ڈپٹی کمشنرز نے شرکت کیتی، اجلاس وِچ محرم الحرام دے دناں وِچ سکیورٹی تے انتظامی کم کاجاں دا تفصیلی جائزہ لیا گیا۔
اجلاس دے دوران کمشنر فیصل آباد، آر پی او، سی ٹی او تے ڈپٹی کمشنرز نے محرم الحرام دے بندوبست دے بارے بریفنگ دتی۔
اِس موقعے تے عظمیٰ بخاری نے ہدایت کیتی کہ سارے جلوساں دے راہواں (راستوں) تے فول پروف سکیورٹی دا پکا بندوبست کیتا جائے تے مجالس و جلوساں دے پربندھکاں (منتظمین) نال لگاتار رابطہ رکھیا جائے۔
وزیر اطلاعات پنجاب نے ہدایت کیتی کہ عاشورے والے دن مسجداں دے باہر نمازیاں لئی سبیلاں لائیاں جان، ساریاں مسجداں تے امام بارگاہواں دے باہر پولیس دی مناسب نفری تعینات کیتی جائے۔
اوہناں آکھیا کہ جلوساں دے روٹس تے لگاتار ٹھنڈے پانی دا چھڑکاؤ کیتا جائے گا تاکہ گرمی دی شدت نوں گھٹ کیتا جا سکے، اِس کم لئی فیصل آباد وِچ سموگ گن وی پہنچا دتی گئی اے۔
عظمیٰ بخاری نے حضرت سلطان باہوؒ دے عرس تے چنیوٹ وِچ ہون والی شہادت کانفرنس لئی وی تگڑے انتظامات کرن دی ہدایت جاری کیتی۔
اوہناں ٹریفک پولیس نوں ہدایت کیتی کہ جلوساں دے راہواں تے ٹریفک دی روانی برقرار رکھن لئی متبادل رستیاں دے بارے شہریاں نوں ویلے سر (بروقت) دَسیا جائے، میڈیا تے سوشل میڈیا تے وی اِس بارے لوکاں نوں دَسیا جائے۔
اجلاس نال خطاب کردیاں عظمیٰ بخاری نے آکھیا کہ فیصل آباد ڈویژن وِچ سارے مکاتبِ فکر دے علما نال انتظامیہ دے افسر لگاتار رابطے وِچ نیں تاکہ محرم الحرام دے دوران امن و امان دا ماحول برقرار رکھیا جا سکے۔
