“سوئٹزرلینڈ وچ پہلا مذاکراتی دور کامیابی نال پورا، کردار ادا کردے رہواں گے: وزیراعظم”
اسلام آباد: ( ) وزیراعظم شہباز شریف نے آکھیا اے کہ اسلام آباد مفاہمتی یادداشت دے تحت ہون والا پہلی اعلیٰ سطحی کمیٹی دا اجلاس سوئٹزرلینڈ دے برگن اسٹاک وچ کامیابی نال مک گیا اے۔
وزیراعظم شہباز شریف نے آکھیا کہ مذاکرات مثبت تے تعمیری ماحول وچ ہوئے تے اونہاں وچ حوصلہ ودھان والی پیش رفت سامنے آئی اے، جس وچ 60 دناں دے اندر اندر حتمی معاہدے تیکر اپڑن لئی روڈ میپ تے اتفاق، سیاسی نگرانی لئی اک اعلیٰ سطحی کمیٹی دا قیام، تے ہور تکنیکی مذاکرات شروع کرن دا فیصلہ شامل اے۔
اونہاں آکھیا کہ میں امریکہ تے ایران دوواں دی قیادت نوں تعمیری مذاکرات لئی اونہاں دے لگیاتار عزم تے خراجِ تحسین پیش کردا واں تے سارے بھراواں تے سجن ملکاں دا شکریہ ادا کردا واں جنہاں نے ایس تاریخی عمل نوں اگے ودھان وچ قیمتی تعاون کیتا۔
وزیراعظم نے آکھیا کہ میں خاص طور تے بھرا ملک قطر دا شکریہ ادا کرنا چاہواں گا جس نے ایس گل بات نوں اگے ودھان لئی سازگار ماحول بنان وچ بڑا اہم کردار نبھایا۔
اونہاں آکھیا کہ میں سوئس حکومت دا بھی شکریہ ادا کردا واں جس نے ایس مذاکرات دی میزبانی تے سہولت کاری وچ اہم کردار ادا کیتا۔
اونہاں ہور آکھیا کہ میں فیلڈ مارشل عاصم منیر نوں خاص خراجِ تحسین پیش کردا واں جنہاں دیاں ان تھک کوششاں نے ایس مذاکرات نوں کامیاب بنایا، اونہاں دی لگن، عزم تے ثابت قدمی سلاہن جوگ اے، تے اونہاں دی کوششاں توں بغیر ایہہ پیش رفت ممکن نہیں سی ہونی۔
وزیراعظم نے آکھیا کہ میں نائب وزیراعظم تے وزیر خارجہ اسحاق ڈار تے وزارتِ خارجہ دی اونہاں دی ٹیم دیاں سفارتی کوششاں تے دلوں شکریہ تے مبارکباد پیش کردا واں، اودنج ای وزیر داخلہ محسن نقوی دی محنت تے خدمات نوں وی سلاہندا واں، جنہاں نے ایس مذاکرات دی کامیابی وچ نمایاں کردار ادا کیتا۔
وزیراعظم شہباز شریف نے آکھیا کہ پاکستان گل بات، سفارت کاری تے اک امن والے تے پکے حل نوں پاؤن لئی اپنا ایمانداری تے مخلصانہ کردار اگے وی نبھاندا رہے گا۔
