اک دہائی پہلاں ٹوائلٹ وچ ڈِگ جان والی انگوٹھی 10 سال بعد واپس مل گئی
اک دہائی بعد منگنی دی گواچی ہوئی انگوٹھی اوہدی اصل مالکن نوں واپس مل گئی۔
ایہہ واقعہ امریکہ وچ سامنے آیا اے۔
مشی گن وچ پلمبراں نوں ایک سیوریج لائن دی مرمت دے دوران اک انگوٹھی ملی سی جیہڑی اک دہائی پہلاں ٹوائلٹ وچ ڈِگ کے گواچ گئی سی۔
پلمبنگ کمپنی دے مالک گریگ جانسن نے دَسیا کہ اوہ اک شاپنگ پلازہ وچ سیوریج لائن نوں ٹھیک کر رہے سن جدوں اک پائپ دے اندر اک چمکدی ہوئی شے نظر آئی۔
اوہناں نے ہور دَسیا کہ ‘ساڈی ٹیم نے اوہنوں چکیا تے اک دوجے ول ویکھیا کہ ہن اسیں ایہدا کی کریئے، تے میں فیصلہ کیتا کہ اسیں ایہدے مالک نوں لبھن دی کوشش کردے آں’۔
گریگ جانسن دی ٹیم نے سوشل میڈیا اُتے اک پوسٹ کیتی سی جس وچ دَسیا سی کہ اوہناں نوں منگنی دی اک انگوٹھی ملی اے۔
ایس پوسٹ نوں پڑھ کے اک خاتون ‘سوئی’ نے اوہناں نال رابطہ کیتا۔
ایس خاتون نے گریگ جانسن نوں دَسیا کہ ‘اوہناں نوں یاد سی کہ 10 سال پہلاں اوہناں دی دکان وچ اک گاہک نے اپنی شادی دی انگوٹھی نوں ٹوائلٹ وچ سٹھ دِتا (ڈِگ پئی) سی، جس توں بعد سوئی تے گاہک نے اوہنوں باہر کڈھن دی ہر ممکن کوشش کیتی پر کامیاب نہ ہو سکے’۔
سوئی نے ای انگوٹھی دی مالکن ‘کیرول اورم’ نال رابطہ کیتا جنہاں ولوں پلمبنگ کمپنی نال رابطہ کیتا گیا۔
پلمبنگ کمپنی دے جنرل منیجر جیسن میٹزنک نے دَسیا کہ ‘اوہ خاتون آئیاں تے اوہناں نے انگوٹھی ویکھ کے آکھیا کہ ایہہ ویکھن وچ میری انگوٹھی ورگی اے، ایہہ انگوٹھی خاتون نے 1965 وچ لئی سی جدوں اوہناں دی شادی ہوئی سی’۔
سیوریج پائپ وچ 10 سال تیکر رہن توں بعد ایہہ انگوٹھی بہت زیادہ گندی ہو گئی سی تے ویکھن وچ سونے دی لگ رہی سی۔
پر جدوں اک مقامی سنار نے اوہنوں صاف تے پالش کیتا تاں اوہ پھر چمکن لگ پئی۔
جیسن میٹزنک دے مطابق ‘کیرول اورم نے ایس انگوٹھی نوں پھر پایا تے روون لگ پئیاں’۔
اوہناں نے ہور دَسیا کہ اوہ انگوٹھی واپس کرن اُتے بہت زیادہ خوشی محسوس کر رہے نیں.
