موبائل ایپ راہیں 1 لکھ توں 15 لکھ روپے تیکر دا قرضہ! سوانیاں لئی وڈی خبر آ گئی
کراچی: سیکیورٹیز اینڈ ایکسچینج کمیشن آف پاکستان (ایس ای سی پی) نے ’’خود مختار خاتون‘‘ فنانسنگ پروڈکٹ دی منظوری دے دتی، سوانیاں (خواتین) 1 لکھ توں 15 لکھ روپے تیکر دی اثاثہ فنانسنگ حاصل کر سکن گیاں۔ تفصیلات مطابق سوانیاں دے کاروبار لئی ایس ای سی پی دی نویں ڈیجیٹل فنانسنگ سہولت شروع (متعارف) کرا دتی گئی اے۔
سیکیورٹیز اینڈ ایکسچینج کمیشن آف پاکستان نے سوانیاں دی کاروباری خودمختاری نوں ودھاؤن لئی اک انقلابی ڈیجیٹل فنانسنگ سہولت دا اعلان کر دتا اے۔ ایس ای سی پی نے باقاعدہ طور اُتے ’’خودمختار خاتون‘‘ فنانسنگ پروڈکٹ دی منظوری دے دتی اے، جس دا مقصد سوانیاں نوں اپنے پیراں اُتے کھڑا کرنا اے۔
ایس نویں پالیسی دے تحت کاروباری سوانیاں اپنے کاروبار نوں شروع کرن یا اوہ نوں ودھاؤن لئی 1 لکھ روپے توں لے کے 15 لکھ روپے تیکر دی اثاثہ فنانسنگ حاصل کر سکن گیاں۔ ایہ فنانسنگ خاص طور اُتے کاروباری مشینری، ضروری سامان تے دوجے کاروباری اثاثیاں دی خریداری لئی ملے گی تاں جے سوانیاں نوں پیسے (سرمائے) دی تھوڑ (کمی) دا سامنا نہ کرنا پوے۔
ایس ای سی پی مطابق ایہ فنانسنگ پروڈکٹ پوری طرحاں ڈیجیٹل تے شریعہ کمپلائنٹ (شرعی اصولاں مطابق) اے، خواہش مند سوانیاں نوں کسے دفتری چکر یا لمی کاغذی کارروائی دی لوڑ نہیں ہووے گی، بلکہ اوہ ’’حکیم‘‘ (Hakeem) موبائل ایپ راہیں سدھی فنانسنگ لئی آن لائن درخواست دے سکن گیاں۔ حاصل کیتی گئی رقم نوں اک سال دے عرصے وچ اکو جیہیاں ماہانہ قسطاں راہیں سوکھے طریقے نال واپس کیتا جا سکے گا۔
ایس ای سی پی نے ڈیٹا سانجھا کردیاں ہویاں دَسیا کہ لسٹڈ نان بینکنگ فنانس کمپنیاں (این بی ایف سیز) نے جولائی توں دسمبر 2025 دے دوران مجموعی طور اُتے 111 ارب روپے دی فنانسنگ فراہم کیتی اے۔ ایس 6 مہینے دے عرصے وچ ملک بھر دے نیڑے تریڑے 75 لکھ مائیکرو تے چھوٹے کاروبار این بی ایف سیز دی فنانسنگ توں فائدہ چُک چکے نیں، تے ہن “خودمختار خاتون” پروڈکٹ راہیں سوانیاں انٹرپرینیورز (کاروباری سوانیاں) نوں ایس نیٹ ورک دا وڈا حصہ بنایا جا رہا اے۔
