چین ولوں پاکستان تے قطر دیاں ثالثی کوششاں دی حمایت

بیجنگ: چین نے ایران تے امریکہ اُتے زور دتا اے کہ اوہ امن مذاکرات وچ حاصل ہون والی پیش رفت تے مثبت رفتار نوں برقرار رکھن تے بات چیت نوں ہور اگے ودھاون۔
چینی وزارتِ خارجہ دے ترجمان گو جیا کن نے کہیا کہ چین امید کردا اے کہ ایران تے امریکہ مذاکرات راہیں مثبت نتائج دے حصول لئی اپنیاں کوششاں جاری رکھن گے۔
گو جیاکن نے سوئٹزرلینڈ وچ ہون والے ایران-امریکہ مذاکرات دے حوالے نال پاکستان، قطر تے ہور فریقاں دیاں ثالثی کوششاں دی وی حمایت دا اظہار کیتا۔
اوہناں نے کہیا کہ چین پاکستان، قطر تے سارے متعلقہ فریقاں دیاں ثالثی تے سفارتی کوششاں دی حمایت کردا اے۔
چینی ترجمان دے ایہہ ریمارکس اوس ویلے سامنے آئے نیں جدوں پاکستان تے قطر نے سوئٹزرلینڈ وچ ہون والے اعلیٰ سطحی مذاکرات دے پہلے دور دے خاتمے اُتے امریکہ تے ایران وچکار جاری سفارتی رابطیاں وچ اہم پیش رفت دا اعلان کیتا اے۔
چین نے ایس گل اُتے زور دتا کہ مذاکرات تے سفارت کاری ای مسئلیاں دے پائیدار تے پُرامن حل دا بہترین راہ نیں، تے سارے فریقاں نوں کشیدگی وچ کمی تے باہمی اعتماد دے فروغ لئی رل کے کم کرنا چاہیدا اے۔