لاہور ہائیکورٹ، انسانی سمگلنگ کیس دے ملزم دی درخواستِ ضمانت مسترد
لاہور: (محمد اشفاق) لاہور ہائیکورٹ نے انسانی سمگلنگ تے باہرلے ملک نوکری دے جھانسے وچ شہری نوں لُٹن دے سنگین مقدمے وچ پھڑے گئے ملزم دی بعد از گرفتاری ضمانت دی درخواست مسترد کر دتی اے۔
لاہور ہائیکورٹ دے جسٹس تنویر احمد شیخ نے ملزم محمد ارشد دی ضمانت دی درخواست اُتے فیصلہ سناندیاں ہویاں دَسیا کہ درخواست گزار اُتے الزام بڑے سنگین نیں تے اوہ رعایت دا حقدار نہیں- ملزم دے خلاف ایف آئی اے تھانہ اے ایچ ٹی سی راولپنڈی وچ 2023 وچ مقدمہ درج ہویا سی، جیہدے وچ اوہدی اُتے انسانی سمگلنگ تے امیگریشن قانوناں دی خلاف ورزی دے الزام لائے گئے سن۔
درخواست گزار دے وکیل نے مؤقف اپنایا کہ ملزم یکم دسمبر 2024 توں جیل وچ اے، مقدمے دا چالان دیر نال جمع ہویا تے ہجے تیکر اک بھی گواہ دا بیان ریکارڈ نہیں کیتا گیا، ایس لئی دیر ہون دی وجہ توں ضمانت دتی جائے- پر سرکاری وکیل نے عدالت نوں دَسیا کہ ملزم تے اوہدے ساتھیاں نے مدعی (کیس کرن والے) توں 25 لاکھ روپے لئے تے اوہدے پُتر نوں غیر قانونی طریقے نال باہرلے ملک گھلّن دا بندوبست کیتا- متاثرہ نوجوان نوں کراچی توں لیبیا تے فیر اٹلی گھلیا گیا، جتھے بیڑی (کشتی) الٹن دے واقعے وچ اوہدے جاں بحق ہون دا ڈر اے تے اوہ ہجے تیکر لاپتہ اے۔
عدالت نے قرار دتا کہ بھاویں اک سال توں ودھ جیل وچ رہن دی بنیاد اُتے ضمانت دتی جا سکدی اے، پر ایہہ کوئی خودبخود ملن والا حق نہیں- عدالت ایہوجہے ملزمان نوں رعایت نہیں دے سکدی جیہڑے سنگین جُرماں وچ ملوث ہون یا جیہناں نوں ’’عادی تے خطرناک مجرم‘‘ سمجھیا جائے- فیصلے وچ کہیا گیا کہ ملزم دا طریقہ واردات بڑا خطرناک تے ظالمانہ اے، جیہدے راہیں سادھے لوکاں نوں باہرلے ملک نوکری دا جھانسا دے کے اوہناں دی عمر بھر دی کمائی لُٹ لئی جاندی اے۔
عدالت نے ایہنوں ’’مالی قتل‘‘ قرار دیاں ہویاں کہیا کہ ایہوجہے بندے کسے رعایت دے حقدار نہیں- جسٹس تنویر احمد شیخ نے دَسیا کہ مقدمے وچ ملزم دے خلاف پکے ثبوتاں تے الزاماں دی سنگینی نوں ویکھدیاں ہویاں ضمانت منظور نہیں کیتی جا سکدی، ایس لئی درخواست خارج کیتی جاندی اے- عدالت نے صاف کیتا کہ فیصلے وچ دتیاں گئیاں گلاں عارضی نیں تے ٹرائل کورٹ (ذیلی عدالت) دے فیصلے اُتے اثر انداز نہیں ہون گیاں۔
لاہور ہائیکورٹ، انسانی سمگلنگ کیس دے ملزم دی درخواستِ ضمانت مسترد
