“ایران توں پبندیاں فوراً نہیں ہٹائیاں جان گیاں، آخری معاہدہ ممکن اے: اسحاق ڈار”
اسلام آباد: نائب وزیراعظم تے وزیر خارجہ اسحاق ڈار نے ہوراں آکھیا اے کہ امریکہ ایران دے برگن سٹاک مذاکرات کجھ دن پہلاں شروع ہو سکدے سن، ایران توں پبندیاں فوراً نہیں ہٹائیاں جان گیاں، مذاکرات دا اگلا مرحلہ اوکھا ہووے گا پر آخری معاہدہ ممکن اے۔
نائب وزیراعظم تے وزیر خارجہ اسحاق ڈار نے عرب میڈیا نوں انٹرویو دیندیاں آکھیا کہ لبنان اتے اسرائیلی حملیاں نے مذاکراتی عمل نوں بوہت متاثر کیتا، امریکی تے ایرانی وفداں نوں مذاکرات دی میز اتے لے کے آؤن دیاں کوششاں تقریباً رک گئیاں سن۔
اسحاق ڈار نے آکھیا کہ صلح صفائی دیاں کوششاں توں بعد تکنیکی پدھر (سطح) دے مذاکرات دوبارہ شروع ہوئے نیں، اے مذاکرات حال ہی دے سمجھوتے (مفاہمتی یادداشت) اتے عملدرآمد لئی ہو رہے نیں، اے امریکہ تے ایران وچالے سفارتی کوششاں دا دوجا مرحلہ اے۔
نائب وزیراعظم نے آکھیا کہ ایران یورینیم باہر گھلن دی بجائے اوہدی افزودگی (امیر بنانے) دی پدھر نوں گھٹ کرے گا، ایٹمی پروگرام، پبندیاں تے منجمد کیتے گئے اثاثیاں اتے ورکنگ گروپس کم کر رہے نیں، لبنان دے معاملے وی مذاکرات دے ایجنڈے وچ شامل نیں-
اسحاق ڈار دا ہور کہنا سی کہ پاکستان ایس سارے عمل وچ سہولت کار دا کردار ادا کر رہیا اے، کجھ معاملے طے کرن لئی 30 دناں دا سماں (مدت) رکھیا گیا اے، جدکہ پورے معاہدے لئی 60 دناں دا ٹائم فریم مقرر کیتا گیا اے۔
اوہناں آکھیا کہ آبنائے ہرمز توں بحری جہاز 60 دناں تیکر بغیر کسے ٹیکس (ٹیرف) دے لنگھ سکدے نیں، جہازاں نوں صرف سٹینڈرڈ نیوی گیشن یا سروس فیس دینی پووے گی۔
اسحاق ڈار دا کہنا سی کہ صدر ڈونلڈ ٹرمپ نے امریکہ ایران مذاکرات دی ذاتی طور تے رہنمائی کیتی، سعودیہ، قطر، مصر تے امارات ایس ثالثی دے عمل دی مدد کر رہے نیں، مذاکرات دا اگلا مرحلہ اوکھا ہو سکدا اے پر آخری معاہدہ حاصل کیتا جا سکدا اے، ایس ڈیل وچ کوئی نیگیٹو (منفی) گل نہیں اے۔
نائب وزیراعظم اسحاق ڈار نے آکھیا کہ پاکستان ایس سارے عمل وچ سہولت کار اے، پاکستان دا ایس وچ کوئی ذاتی مفاد نہیں، پاکستان نے خالص طور تے امت مسلمہ تے دنیا دے امن لئی ثالثی دا مخلصانہ کردار ادا کیتا اے۔
اسحاق ڈار نے آکھیا کہ سبھ کجھ ‘اسلام آباد معاہدے’ دے اندر ای موجود اے، اے تاثر غلط اے کہ پچھے کوئی لُکی چھپی (خفیہ) ڈیل ہوئی اے، دوویں پاسیاں دی مرضی نال معاہدے دے سمیں (مدت) وچ وادھے دی گنجائش وی موجود اے۔
