فیلڈ مارشل تے وزیرِاعظم دی اگوائی وچ پاکستان دا عالمی وقار اچا ہویا: خواجہ آصف

اسلام آباد:وزیرِ دفاع خواجہ محمد آصف نے آکھیا اے کہ فیلڈ مارشل تے وزیرِاعظم دی اگوائی (قیادت) وچ پاکستان دا عالمی وقار اچا ہویا اے۔

اسلام آباد وچ پارلیمنٹ دے باہر میڈیا نال گل بات کردیاں خواجہ آصف نے آکھیا اے کہ ایران تے پاکستان دے تعلقات نویاں بلندیاں ول جا رہے نیں، خطے وچ چھک تان (کشیدگی) گھٹ کرن وچ پاکستان نے تریخی کردار ادا کیتا۔

خواجہ آصف دا کہنا سی کہ بھارت پاکستان دے اثر والے سفارتی کردار توں خوش نہیں، جے بھارت نے دوبارہ ہتھ چکیا (جارحیت کیتی) تے بھرواں جواب دتا جاوے گا، پاکستان نے جنگ دی بجائے مذاکرات تے امن دا راہ چنیا اے۔

اوہناں آکھیا کہ امتِ مسلمہ پاکستان دے کردار نوں عزت دی نگاہ نال ویکھ رہی اے، خلیجی خطے وچ امن تے استحکام لئی پاکستان دیاں کوششاں سراہن جوگ نیں۔

وفاقی وزیر دا کہنا سی کہ پاکستان اپنی مغربی سرحداں اتے امن چاہندا اے، افغانستان نال بھراواں ورگے تے پُر امن تعلقات چاہندے آں، افغان قیادت پاکستان دی دہاکیاں پرانی مہمان نوازی نوں یاد رکھے، پاکستان نے افغان عوام نوں پناہ، تعلیم تے روزگار دتا۔

اوہناں اے بھی آکھیا کہ پاکستان دی قیادت نے عالمی پدھر اتے چنگا تے اثر والا کردار ادا کیتا، پاکستان خطے وچ امن، استحکام تے ترقی چاہندا اے، دنیا پاکستان دی قیادت تے کردار دی تعریف کر رہی اے۔