آزاد کشمیر وچ امن وامان برقرار رکھنا حکومت دی پہلی ترجیح اے: چیف سیکرٹری
مظفر آباد: چیف سیکرٹری آزاد جموں و کشمیر نے کہیا اے کہ آزاد کشمیر وچ امن و امان برقرار رکھنا حکومت دی پہلی ترجیح اے۔
آئی جی پولیس آزاد کشمیر لیاقت علی ملک دے نال پریس کانفرنس کردیاں چیف سیکرٹری دا کہنا سی کہ جوائنٹ ایکشن کمیٹی دے کماں پاروں ریاست وچ امن خراب ہویا، کہیا گیا کہ اسیں اسلام آباد تے وی لشکر کشی کراں گے، کالعدم جوائنٹ ایکشن کمیٹی نے لوکاں نوں اسلحہ پہنچایا۔
اوہناں کہیا کہ ایڈوانس انکم ٹیکس دا خاتمہ اسیں نہیں منیا، ارباں روپیاں دا نقصان ہو رہیا سی، حکومتِ پاکستان نے لوزاں پوریاں کرن لئی 20 توں 25 ارب دتے، آٹے تے بجلی دیاں قیمتاں تے عوامی ہمدردی حاصل کیتی گئی، جیڑے معاملے منن جوگے سن اوہناں تے عمل ہویا، جائز مطالبات پورے ہون دے باوجود احتجاج دا راہ چنیا گیا۔
اوہناں دا کہنا سی کہ مطالبات ودھدے ودھدے گل ایتھوں تک آ پہنچی، آزاد کشمیر وچ سامان لے جان والے اک ٹرک نوں وی ساڑیا گیا، مہاجرین دیاں 12 سیٹاں نوں احتجاج لئی بہانہ بنایا گیا۔ چیف سیکرٹری آزاد جموں و کشمیر نے ہور کہیا کہ مظفرآباد تے میرپور ریجن دے عوام نے ساڈے نال پورا تعاون کیتا، عوام نے کہیا کہ دھرنے وچ بیٹھے لوکاں نال ساڈا کوئی تعلق نہیں، دھرنے وچ شامل لوک اپنے آپ نوں قنون دے حوالے کرن۔
شرپسند عناصر آزاد کشمیر دا امن داؤ تے لا رہے نیں: آئی جی پولیس آزاد کشمیر
ایس موقعے تے آئی جی پولیس آزاد کشمیر لیاقت علی ملک نے کہیا کہ نوجواناں نوں ریاست تے اسلحے نال حملہ کرن لئی تیار کیتا گیا، شرپسند عناصر آزاد کشمیر دا امن داؤ تے لا رہے نیں ۔
اوہناں دا کہنا سی کہ قنون دی بالادستی انتظامیہ دی پہلی ترجیح اے، راولاکوٹ وچ اک وڈا حادثہ پلان کیتا گیا سی، پولیس والے نوں شہید کر کے لاش تے نچیا گیا، لاشاں تے نچنا کیہ انسانیت اے؟ اسلام آباد پولیس دے اہلکار دا شناختی کارڈ دیکھ کے اوہدا تے تشدد کیتا گیا۔
لیاقت علی ملک نے کہیا کہ پولیس تے سکیورٹی اداریاں دے اہلکاراں تے حملے کیتے گئے، آرمی دے شہداء بارے نا مناسب لفظ ورتے گئے۔
آئی جی دا کہنا سی کہ ہن تک 572 شرپسند گرفتار ہو چکے نیں، جنہاں نے پولیس اہلکاراں نوں شہید کیتا اوہناں نوں پھڑیا جا چکا اے، دھرناں وڈھ کے لاشاں منگلا ڈیم چوں ملن دیاں دھمکیاں دینا، کیہ ایہہ عوامی مسئلہ اے؟ بھارتی سفارتخانے دے سہمنے پاکستان دا جھنڈا ساڑنا کیہ عوامی مسئلہ اے؟ کیہ سرکاری ملازماں نوں اغوا کرنا عوامی مسئلہ اے؟
اوہناں کہیا کہ کچھ خاص شرپسند اک خاص ایجنڈے تے کم کر رہے نیں، اک مسلح جتھہ ریاست دے خلاف مورچہ لائی بیٹھا اے، ساڈی پولیس دے 4 لوک شہید تے 97 اہلکار زخمی ہوئے۔
