پاکستان تے ایران دا برادرانہ تعلقات نوں ہور مضبوط بناؤن دے عزم دا اعادہ
اسلام آباد صدر آصف علی زرداری تے ایرانی صدر ڈاکٹر مسعود پزشکیان دے وچکار ایوانِ صدر وچ ملاقات ہوئی جیہدے وچ دوویں ملکاں نے دوطرفہ تعلقات تے خطے وچ امن تے استحکام نوں ودھاؤن دے عزم نوں دہرایا۔
ملاقات وچ صدر آصف علی زرداری نے پاکستان ولوں ایران دی خودمختاری تے علاقائی سالمیت دی حمایت دا اعادہ کیتا تے خطے وچ پائیدار امن لئی مذاکرات تے سفارتکاری دی اہمیت اُتے زور دِتا۔
ایرانی صدر ڈاکٹر مسعود پزشکیان نے امن تے بات چیت لئی پاکستان دے مثبت کردار نوں سراہندیاں ہوئیاں آکھیا کہ ایران پاکستان دے نال سیاسی، اقتصادی تے سکیورٹی تعاون نوں ہور ودھانا چاہندا اے۔
ملاقات وچ اقتصادی تعاون، رابطہ کاری تے علاقائی سلامتی نال جڑے معاملیاں اُتے تفصیل نال گل بات کیتی گئی۔
صدر زرداری نے اسلام آباد وچ طے پاؤن والی مفاہمتی یادداشت دا خیرمقدم کردیاں ہوئیاں مستقل امن دی امید ظاہر کیتی، اوہناں نے سپریم لیڈر آیت اللہ سید علی خامنہ ای لئی نیک تمناواں دا اظہار وی کیتا۔
ایرانی صدر نے اجوکے مشکل حالات وچ پاکستان دی حمایت تے تعاون اُتے شکریہ ادا کیتا۔
دوواں رہنماواں نے برادرانہ تعلقات نوں ہور مضبوط بناؤن دے عزم دا اعادہ کیتا جدکہ صدر زرداری نے مسلم اُمہ دے اتحاد تے خلیجی ملکاں نال مضبوط تعلقات قائم رکھن دے عزم دا وی اظہار کیتا۔
