روس یوکرین تنازع دے خاتمے لئی مذاکراتی عمل بحال کیتا جائے: پاکستان

نیویارک: (ویب ڈیسک) پاکستان نے روس یوکرین دے رولے (تنازع) نوں مکاؤن لئی ترت پھرت (فوری) جنگ بندی تے گل بات دے عمل نوں دوبارہ شروع کرن دا مطالبہ کیتا اے۔

اقوام متحدہ وچ پاکستان دے مستقل مشن ولوں جاری کیتے گئے بیان دے مطابق یوکرین دے معاملے اُتے سکیورٹی کونسل دے اجلاس وچ پاکستان دے نائب مستقل نمائندے تے سفیر عثمان جدون نے افسوس دا اظہار کیتا کہ یوکرین جنگ نوں مکاؤن لئی کوئی چنگی پیشرفت نہیں ہو رہی، جس پاروں ایہ رولا ہور ودھدا جا رہا اے۔

پاکستانی سفیر نے چاننا پایا کہ جنگ دی وجہ توں عام شہریاں تے شہری انفراسٹرکچر نوں نقصان پہنچ رہا اے، یوکرین تنازع دے حل لئی کھِچ تان وچ فوری کمی تے تعمیری سفارت کاری کیتی جائے۔

پاکستان یوکرین رولے دے پرامن حل دی پوری حمایت دا اعادہ کردا اے تے ہر اوس کوشش دی مدد کردا اے جیہڑی اقوام متحدہ دے چارٹر، بین الاقوامی قانون تے ساریاں دھریاں دے جائز قومی سلامتی دے مفادات نوں دھیان وچ رکھے۔