چند وفاقی وزراء وزیراعظم لئی مشکلاں پیدا کر رہے نے: بلاول بھٹو زرداری

اسلام آباد: چیئرمین پاکستان پیپلز پارٹی بلاول بھٹو زرداری نے آکھیا اے کہ چند وفاقی وزراء وزیراعظم لئی مشکلاں پیدا کر رہے نے، شاید انہاں وزراء دا طرزِ سیاست انج دا ہی اے۔

قومی اسمبلی چ اظہارِ خیال کردیاں ہوئیاں بلاول بھٹو زرداری دا کہنا سی کہ موجودہ صورتحال چ پاکستان دیاں ساریاں سیاسی جماعتاں اکٹھیاں ہو کے مقابلہ کرن، چند وزراء دا مقصد سمجھ توں باہر اے، ایسے وزیر کیوں نے جیہڑے کہندے نے راولاکوٹ والے کشمیری نہیں؟

انہاں نے آکھیا کہ حکومت تے ساریاں سیاسی جماعتاں نے آزاد کشمیر دے معاملے دا سیاسی حل کڈھن دی کوشش کیتی، بے شک وزیر اعظم شہباز شریف ملک نوں مسائل چوں کڈھن دا عزم رکھدے نے، مسائل دا حل مذاکرات تے گل بات نال ہی ممکن اے۔

ملک بھر چ بلدیاتی الیکشن کروان دا مطالبہ

انہاں دا کہنا سی کہ ملک بھر چ بلدیاتی الیکشن کروائے جان، اسلام آباد چ الیکشن کرواؤ تے ماڈل نظام لاؤ، بلدیاتی نظام دا بہانہ صرف سانوں آپس چ لڑوانا اے، گلگت بلتستان چ حکومت بنن جا رہی اے، 90 دناں چ بلدیاتی الیکشن دی کوشش کراں گے، کراچی چ جیہڑا بلدیاتی نظام لائے آں اوہ تسیں لاہور چ لا کے دکھاؤ۔

چیئرمین پیپلز پارٹی دا کہنا سی کہ وڈیاں گلاں کر رہے نے آئین چ ترمیم دیاں، تسیں قرارداد پیش کرو۔