پنجاب: یونین کونسلاں دی حد بندی دے کم لئی نظرثانی شدہ شیڈول جاری
لاہور: پنجاب چ یونین کونسلاں دی حد بندی دے کم لئی نظرثانی شدہ شیڈول جاری کر دتا گیا اے۔
الیکشن کمیشن نے حد بندی دے عمل بارے 15 اپریل 2026 دے نوٹیفکیشن چ جزوی ترمیم کر دتی اے۔
جاری کیتے گئے نوٹیفکیشن دے مطابق ووٹرز ولوں ڈیلیمٹیشن اتھارٹیز دے ساہمنے اعتراضات جمع کروان دی مدت 4 جولائی 2026 تیکر ودھا دتی گئی اے، جدکہ اعتراضات تے فیصلے کرن دی آخری تریخ 29 جولائی 2026 مقرر کیتی گئی اے۔
نوٹیفکیشن چ دسیا گیا اے کہ ڈیلیمٹیشن اتھارٹیز دے فیصلیاں بارے معلومات ڈیلیمٹیشن کمیٹیاں نوں 7 اگست 2026 تیکر فراہم کیتیاں جان گیاں، پنجاب چ یونین کونسلاں دی حتمی حلقہ بندیاں دی لسٹ 17 اگست 2026 نوں شائع کیتی جائے گی۔
الیکشن کمیشن نے حد بندی دے عمل نوں متھیاں ہوئیاں ٹائم لائنز دے مطابق مکمل کرن، یونین کونسلاں دی حد بندی دا عمل شفاف، منصفانہ تے قانون دے مطابق پورا کرن تے سارے متعلقہ اداریاں تے حکام نوں نظرثانی شدہ شیڈول تے عملدرآمد یقینی بناؤن دی ہدایت کیتی اے۔
