آزاد کشمیر دی ترقی تے عوامی فلاح و بہبود بارے مطالبات من لئے گئے نے: رانا ثناء اللہ
اسلام آباد: رانا ثناء اللہ نے آکھیا اے کہ آزاد کشمیر دی ترقی تے عوامی فلاح و بہبود بارے سارے مطالبات من لئے نے۔
قومی اسمبلی چ خطاب کردیاں ہوئیاں رانا ثناء اللہ نے آکھیا کہ کشمیر پاکستان دی شہ رگ اے، پاکستان تے کشمیریاں دے وچکار لازوال رشتہ قائم اے، کالعدم ایکشن کمیٹی نے اک سال پہلاں وی جلاؤ گھیراؤ تے تشدد دا راہ اپنایا سی، جدکہ مولانا نے کشمیر بارے جیہڑی گل کیتی اوہ اہم اے۔
وزیراعظم دے سیاسی مشیر نے آکھیا کہ پچھلے سال کالعدم ایکشن کمیٹی نے 38 مطالبات پیش کیتے، کالعدم ایکشن کمیٹی دا بجلی بارے 10 ارب روپے دا مطالبہ سی، مطالبات چ کوئی انج دا مطالبہ نہیں جیہڑا پورا نہ کیتا گیا ہووے، بجلی دا نظام درست کرن لئی 10 ارب روپے دی رقم فراہم کیتی، جدکہ کالعدم ایکشن کمیٹی نال پچھلے سال مظفر آباد چ مذاکرات کیتے سن۔
رانا ثناء اللہ دا کہنا سی کہ اج آزاد کشمیر چ بجلی دا ریٹ ساڑھے تن روپے یونٹ اے، آزاد کشمیر لئی کنک (گندم) تے سبسڈی دتی جا رہی اے، مہاجرین دیاں نشستاں دا معاملہ آئینی تے قانونی اے، مہاجرین دیاں نشستاں دے معاملے تے 6 رکنی کمیٹی بنائی گئی سی۔
مشیر برائے سیاسی امور رانا ثناء نے آکھیا کہ طے ہویا سی کہ کمیٹی مہاجرین دیاں نشستاں تے اپنی سفارشات آزاد کشمیر حکومت نوں پیش کرے گی، کالعدم ایکشن کمیٹی نے مہاجرین دیاں نشستاں دے معاملے تے قائم کمیٹی دا بائیکاٹ کیتا، احتجاج دی کال دا مقصد آزاد کشمیر دے الیکشن نوں رکوانا اے، پر مہاجرین نوں ووٹ دے حق توں محروم کرنا تحریکِ آزادی دے مقصد توں انحراف اے۔
رانا ثناء اللہ نے آکھیا کہ کالعدم ایکشن کمیٹی نے مہاجرین دیاں نشستاں دے معاملے تے آل پارٹیز کانفرنس چ جان توں وی انکار کیتا، کالعدم ایکشن کمیٹی نوں کئی آپشن دتے گئے جنہاں توں انکار کر دتا گیا، کالعدم ایکشن کمیٹی نے جتھہ کلچر راہیں اپنا مطالبہ منوان دا راہ اپنایا۔`
