سکیورٹی گارڈ قتل کیس: عمر قید دی سزا پاؤن والے ملزم دی اپیل منظور
لاہور: (محمد اشفاق) چیف جسٹس لاہور ہائیکورٹ عالیہ نیلم نے سکیورٹی گارڈ نوں قتل کرن دے جرم چ عمر قید دی سزا پاؤن والے ملزم دی اپیل منظور کر لئی اے۔
چیف جسٹس عالیہ نیلم نے قانونی نکتہ طے کردیاں ہوئیاں آکھیا کہ فوجداری قانون دا منیا ہویا اصول اے کہ شک دا فائدہ ملزم نوں دتا جاندا اے، جے ریکارڈ تے اک وی معقول شک موجود ہووے تے ملزم بریت (آزاد ہون) دا حق دار ہوندا اے۔
چیف جسٹس لاہور ہائیکورٹ جسٹس مس عالیہ نیلم نے ملزم بلال احمد دی اپیل تے 30 صفحیاں تے مشتمل تفصیلی فیصلہ جاری کیتا۔
13 جنوری 2020 نوں فیصل آباد پولیس نے سکیورٹی گارڈ نوں قتل کرن دے جرم چ شہری بلال دے خلاف مقدمہ درج کیتا سی، ٹرائل کورٹ نے مارچ 2021 نوں بلال نوں عمر قید دی سزا سنا دتی سی، چیف جسٹس عالیہ نیلم نے فیصلے چ لکھیا کہ درخواست قانونی جواز توں محروم اے۔
فیصلے چ مزید آکھیا گیا کہ استغاثہ دے گواہاں دے بیانات چ واضح تضاد موجود نے، جدکہ وقوعے دے ویلے گواہاں دی جائے وقوعہ (موقعے) تے موجودگی وی مشکوک دکھائی دیندی اے، مقدمے دی ایف آئی آر تے بعد چ ہون والی تفتیشی کارروائی وی کئی سوالاں نوں جنم دیندی اے۔
چیف جسٹس عالیہ نیلم نے فیصلے چ قرار دتا کہ فوجداری قانون دا منیا ہویا اصول اے کہ شک دا فائدہ ملزم نوں دتا جاندا اے، جے ریکارڈ تے اک وی معقول شک موجود ہووے تے ملزم بریت دا حق دار ہوندا اے۔
عدالت نے قتل کیس چ سزا ودھاؤن لئی مدعی مقدمہ ولوں دائر نظرثانی درخواست وی مسترد کر دتی تے عدالت نے ملزم بلال احمد دی اپیل منظور کردیاں ہوئیاں عمر قید دی سزا کالعدم قرار دے دتی۔
