حج 2027 آن لائن رجسٹریشن، 2 دناں چ 51 ہزار توں ودھ درخواستاں موصول
اسلام آباد: وزارت مذہبی امور نے آکھیا اے کہ حج 2027 دی آن لائن رجسٹریشن مہم نوں عوامی پدھر تے بھرپور پذیرائی ملی اے، جس دے نتیجے چ 2 دناں دے دوران رجسٹرڈ عازمین دی گنتی 51 ہزار توں ٹپ گئی اے۔
ترجمان وزارت مذہبی امور دے مطابق ہن تیکر 46 ہزار لوکاں نے آن لائن پورٹل راہیں جدکہ 5 ہزار لوکاں نے پاک حج موبائل ایپ ورتدیاں ہوئیاں گھر بیٹھے اپنی رجسٹریشن مکمل کیتی اے۔
اعداد و شمار دے مطابق 41 ہزار لوکاں نے سرکاری حج سکیم جدکہ 10 ہزار لوکاں نے پرائیویٹ حج سکیم دی چون کیتی اے، رجسٹریشن کروان والیاں چ پنجاب دے 24 ہزار، سندھ دے 16 ہزار، خیبر پختونخوا دے 7 ہزار تے اسلام آباد دے 3 ہزار شہری شامل نے۔
ترجمان نے دسیا اے کہ بلوچستان توں 800، آزاد کشمیر توں 260 تے گلگت بلتستان توں 77 لوکاں نے حج 2027 لئی رجسٹریشن کروائی اے، رجسٹرڈ عازمین چ 30 ہزار مرد تے 21 ہزار عورتاں شامل نے، جدکہ 30 توں 48 سال دی عمر دے لوکاں دی گنتی نمایاں رہی اے۔
وزارت مذہبی امور دا کہنا اے کہ نیشنل آئی ٹی بورڈ دے تعاون نال حج آپریشن نوں مکمل طور تے پیپر لیس تے اینڈ ٹو اینڈ ڈیجیٹل نظام چ بدلیا جا رہا اے، جس دا مقصد عازمین نوں سوکھیاں، شفاف تے جدید سہولتاں فراہم کرنا اے۔
ترجمان نے دسیا کہ حج 2027 لئی لازمی رجسٹریشن مہم بنا کسے رکاوٹ دے جاری رہے گی، جدکہ حج اخراجات، پیکیجز تے دوجیاں تفصیلاں دوجے مرحلے چ جاری کیتیاں جان گیاں۔
وزارت مذہبی امور نے خواہشمند عازمین نوں ہدایت کیتی اے کہ وہ متھی ہوئی مدت دے اندر اپنی رجسٹریشن مکمل کرن تاکہ آؤن والے مرحلیاں چ اوہناں نوں کسے اوکھ دا سامنا نہ کرنا پوے۔ رجسٹریشن لئی وزارت مذہبی امور دے آن لائن پورٹل توں فائدہ اٹھایا جا سکدا اے۔
