26 نومبر احتجاج کیس: علیمہ خان دی وفاقی تے صوبائی وزراء نوں سدن دی درخواست تے فیصلہ محفوظ
راولپنڈی: انسدادِ دہشت گردی عدالت چ علیمہ خان خلاف 26 نومبر احتجاج کیس دی سماعت مکمل ہون توں بعد عدالت نے وزراء تے میڈیا شخصیتاں نوں بطور گواہ سدن دی درخواست تے فیصلہ محفوظ کر لیا اے۔
کیس دی سماعت انسدادِ دہشت گردی عدالت دے جج امجد علی شاہ نے کیتی۔
سماعت دے دوران علیمہ خان ولوں وفاقی وزیر داخلہ محسن نقوی، وفاقی وزیر اطلاعات عطا تارڑ، صوبائی وزیر اطلاعات عظمیٰ بخاری تے میڈیا نال جڑے بندیاں سمیت مجموعی طور تے 21 لوکاں نوں بطور عدالتی گواہ سدن دی درخواست تے دلیلاں دتیاں گئیاں۔ ایہہ درخواست 26 نومبر دے احتجاج بارے تھانہ صادق آباد چ درج مقدمے دے پچھوکڑ چ دائر کیتی گئی سی۔
سرکاری وکیل (استغاثہ) نے عدالت چ مؤقف اپنایا کہ وزراء تے میڈیا پرسنز نوں بطور گواہ سدن دی درخواست کیس نوں لٹکاؤن دا حربہ اے، پراسیکیوٹر نے آکھیا کہ استغاثہ اپنا مقدمہ مکمل طور تے بند کر چکیا اے، اس لئی علیمہ خان دی درخواست مسترد کیتی جائے۔ پراسیکیوشن دے مطابق عدالت کسے نوں بنا وجہ بطور کورٹ گواہ نہیں سد سکدی، ہن علیمہ خان دا صفائی دا بیان ریکارڈ کیتا جانا چاہیدا اے۔
دوجے پاسے وکیلِ صفائی فیصل ملک نے مؤقف اختیار کیتا کہ اپنی صفائی لئی ملزمان کسے وی بندے نوں بطور گواہ سد سکدے نے، اوہناں آکھیا کہ فیئر ٹرائل (انصاف دے تقاضیاں) دے تحت وزراء تے میڈیا پرسنز دی طلبی ضروری اے، کیوں جے 27 نومبر نوں ملک دے کسے علاقے چ احتجاج نہیں ہویا، جس دی تصدیق میڈیا راہیں ہو سکدی اے۔
دواں دھریاں دے دلاصل مکمل ہون توں بعد عدالت نے درخواست تے فیصلہ محفوظ کر لیا، جدکہ سماعت توں بعد علیمہ خان انسدادِ دہشت گردی عدالت توں واپس روانہ ہو گئیاں۔
