ہنرمند نوجوان ہی پاکستان دا روشن مستقبل، بیرونِ ملک موقعیاں توں فائدہ اٹھاؤن: مریم نواز
لاہور: وزیراعلیٰ پنجاب مریم نواز نے آکھیا اے کہ ہنرمند نوجوان ہی پاکستان دا روشن مستقبل نے، ہنرمند نوجوان نہ صرف اپنے خانداناں دی بہتر کفالت کر سکدے نے بلکہ ملک تے قوم دا قیمتی سرمایہ وی نے۔
مریم نواز نے پرواز کارڈ پروگرام دے تحت ٹریننگ مکمل کرن والے نوجواناں نال ملاقات کردیاں ہوئیاں اوہناں نوں مبارکباد دتی تے آکھیا کہ ٹریننگ مکمل کرن والے طلبا نوں دیکھ کے خوشی ہو رہی اے، اوہناں نے نوجواناں دے جذبے، محنت تے ماپیاں (والدین) دی مدد دے احساس نوں سراہندیاں ہوئیاں آکھیا کہ گھٹ عمر چ گھر تے ماپیاں دیاں ذمہ داریاں چکنیاں وڈی گل اے تے بہن بھائیاں سمیت پورے ٹبر دی ذمہ داری سانبنا سوکھا کم نہیں۔
تقریب نال خطاب کردیاں ہوئیاں اوہناں نے آکھیا کہ اللہ تعالیٰ نے نوجواناں نوں لین والا نہیں بلکہ دین والا بنایا اے، اس لئی اوہ اپنی صلاحیتاں تے محنت راہیں معاشرے چ مثبت کردار ادا کرن، باہرلے ملکاں چ روزگار دے موقعے نوجواناں لئی بوہت اہم نے کیوں جے اس نال بہتر آمدن دے نال نال قیمتی تجربہ تے جدید پیشہ ورانہ مہارتاں حاصل ہوندیاں نے۔
مریم نواز دا کہنا سی کہ باہرلے ملکاں چ کم کرن نال نوجوان دنیا دے جدید نظام، کم دے طریقے تے ترقی یافتہ ملکاں دے طرزِ عمل توں واقف ہوندے نے، اوہناں نے نوجواناں نوں نصیحت کیتی کہ اوہ وکھو وکھ ملکاں دا مشاہدہ کرن تے قوماں دی ترقی دے اسباب نوں سمجھن دی کوشش کرن۔
اوہناں نے آکھیا کہ پاکستان دی افرادی قوت دا وڈا حصہ غیر ہنرمند ورکرز تے مشتمل اے، جس پاروں اوہناں نوں بہتر تنخواہ تے مقام حاصل کرن چ مشکلاں آؤندیاں نے، حکومت پنجاب نوجواناں نوں وکھ وکھ شعبیاں چ فنی تعلیم فراہم کر رہی اے تے پنج لاکھ توں ودھ نوجواناں نوں ہنرمند بناؤن دی کوشش جاری اے۔
وزیراعلٰی نے آکھیا کہ ہر نوجوان لئی یونیورسٹی دی ڈگری حاصل کرنا ممکن نہیں، پر فنی تعلیم تے سکل ڈویلپمنٹ راہیں روزگار دے بہتر موقعے حاصل کیتے جا سکدے نے، نوجواناں نوں اوہناں دی صلاحیتاں تے دلچسپی دے مطابق ٹریننگ دتی جا رہی اے تاکہ اوہ ملکی تے عالمی منڈی چ بہتر روزگار پا سکن۔
اوہناں نے مزید آکھیا کہ سکلڈ ورکرز نوں باہرلے ملکاں چ زیادہ عزت تے بہتر معاوضہ ملدا اے، مریم نواز نے منصوبے دی کامیابی لئی عدنان چٹھہ تے اوہناں دی ٹیم دی کوشیشاں نوں وی سراہیا تے آکھیا کہ نوجواناں دی فنی ٹریننگ حکومت دی اولین ترجیحات چ شامل اے، جدکہ ہنرمند افرادی قوت پاکستان دا قیمتی اثاثہ اے۔
وزیراعلیٰ پنجاب مریم نواز نے آکھیا کہ باہرلے ملک جان والے پاکستانی ورکرز چ 50 فیصد توں ودھ لوک غیر ہنرمند کیٹیگری چ شامل ہوندے نے، جس دی وجہ توں اوہناں نوں بہتر تنخواہواں، ترقی دے موقعیاں تے پیشہ ورانہ سڃان دے حصول چ مشکلاں دا سامنا کرنا پیندا اے، عالمی منڈی چ مقابلے لئی جدید مہارتاں دا حصول لازمی ہو چکیا اے۔
اوہناں نے دسیا کہ حکومت پنجاب نوجواناں نوں مقامی تے عالمی مارکیٹ دی لوڑاں دے مطابق فنی ٹریننگ دے رہی اے، اس مقصد لئی کنسٹرکشن، ہاسپیٹیلٹی، ٹرانسپورٹ، لوجسٹکس، انجینئرنگ، انرجی تے ہیلتھ سمیت وکھ وکھ شعبیاں نوں ترجیح دتی گئی اے تاکہ نوجوان روزگار دے بہتر موقعیاں توں فائدہ چکن۔
مریم نواز دے مطابق نرسنگ، کُکری، ہائیڈروکاربنز تے رینیوایبل انرجی ورگے ابھردے ہوئے شعبیاں چ وی تربیتی پروگرام شروع کیتے گئے نے، جدکہ روایتی فنی تعلیم دے نال جدید ٹیکنیکل کورسز نوں وی نصاب دا حصہ بنایا گیا اے تاکہ نوجوان بدلدیاں ہوئیاں عالمی لوڑاں دے مطابق ڈھل سکن۔
اوہناں نے آکھیا کہ سعودی عرب تے ملائیشیا سمیت وکھو وکھ ملکاں دیاں کمپنیاں نال رابطیاں راہیں روزگار دے نویں موقعے پیدا کیتے جا رہے نے تاکہ ٹریننگ مکمل کرن والے نوجوان محفوظ، باوقار تے بہتر کیریئر دا آغاز کر سکن، سکل ڈویلپمنٹ نہ صرف نوجواناں دے روشن مستقبل بلکہ ملکی معیشت دے استحکام دی وی ضمانت اے۔
وزیراعلٰی دا کہنا سی کہ حکومت نے باہرلے ملک نوکری دے خواہشمند نوجواناں نوں درپیش مالی مشکلاں نوں وی دھیان چ رکھیا اے، ویزا فیس، میڈیکل ٹیسٹ، ٹکٹ تے دوجے سفری اخراجات اکثر نوجواناں لئی وڈی رکاوٹ بن جاندے نے، اسے لئی اوہناں نوں اسان شرائط تے قرضیاں دی سہولت دتی جا رہی اے تاکہ اوہ اپنے روزگار دے خواب نوں سچ کر سکن۔
وزیراعلٰی نے آکھیا اے کہ ہن تیکر 105 نوجواناں نوں وکھ وکھ شعبیاں چ نوکریاں فراہم کیتیاں جا چکیاں نے، جدکہ عورتاں لئی وی کنسٹرکشن سمیت وکھو وکھ شعبیاں چ روزگار دے نویں موقعے پیدا کیتے جا رہے نے، بہتر تنخواہواں نوجواناں نوں نہ صرف اپنے خانداناں دی کفالت چ مدد دین گیاں بلکہ اوہناں نوں بچت تے بہتر معیارِ زندگی دا موقع وی فراہم کرن گیاں۔
