صدر مملکت دا سفارتکاری، مکالمے تے تعاون نوں فروغ دین تے عورتاں نوں خراجِ تحسین
اسلام آباد: صدرِ مملکت آصف علی زرداری نے عورتاں سفارتکاراں دے عالمی دیہاڑے تے عورتاں دیاں خدمات نوں خراجِ تحسین پیش کردیاں ہوئیاں آکھیا اے کہ اقوامِ متحدہ سمیت عالمی فورمز تے عورتاں سفارت کار پاکستان دا مؤقف مؤثر انداز چ پیش کر رہیاں نے۔
اپنے پیغام چ صدر پاکستان آصف علی زرداری دا کہنا اے کہ عورتاں سفارت کار امن، مکالمے تے بین الاقوامی تعاون نوں ودھاؤن چ کلیدی کردار ادا کر رہیاں نے، پاکستان چ عورتاں دی سفارتی خدمات دی روشن روایت موجود اے، بیگم رعنا لیاقت علی خان تے شائستہ اکرام اللہ نے پاکستان دا وقار عالمی پدھر تے بلند کیتا۔
اوہناں نے آکھیا کہ شہید محترمہ بینظیر بھٹو نے پاکستان دے عالمی رابطیاں نوں مزید مضبوط کیتا، پاکستانی عورتاں سفیر، مستقل مندوب تے اعلیٰ سفارتی عہدیاں تے نمایاں خدمات انجام دے رہیاں نے، موجودہ عالمی چیلنجز دے پچھوکڑ چ عورتاں سفارت کاراں دیاں ذمہ داریاں ہور اہم ہو گئیاں نے۔
اوہناں دا کہنا سی کہ آئینِ پاکستان عورتاں تے مرداں نوں برابر حقوق تے اکو جیہا قانونی تحفظ فراہم کردا اے، پاکستانی عورتاں سفارتی مشنز تے بین الاقوامی تنظیماں چ اہم ذمہ داریاں نبھا رہیاں نے، حالیہ سفارتی پیش رفت نے مسلسل رابطے تے خاموش سفارت کاری دی اہمیت نوں واضح کیتا اے، پاکستان نے امریکہ تے ایران دے وچکار مفاہمتی عمل چ مثبت کردار ادا کیتا۔
صدرِ مملکت نے آکھیا کہ اقوامِ متحدہ سمیت عالمی فورمز تے عورتاں سفارت کار پاکستان دا مؤقف مؤثر انداز چ پیش کر رہیاں نے، عورتاں سفارت کاروں دیاں خدمات نے پاکستان دے بین الاقوامی وقار چ اضافہ کیتا اے۔
آصف علی زرداری دا مزید کہنا سی کہ پاکستان دنیا دے نال سنجیدہ، باوقار تے بامقصد رابطیاں نوں ودھاؤن لئی پُرعزم اے۔
