بھارت اسرائیل گٹھ جوڑ پاکستان نوں نقصان پہنچا رہا اے: بلاول بھٹو زرداری
اسلام آباد: پاکستان پیپلز پارٹی دے چیئرمین بلاول بھٹو زرداری نے آکھیا اے کہ بھارت تے اسرائیل دا گٹھ جوڑ پاکستان نوں نقصان پہنچا رہا اے تے پاکستان نوں ایس گٹھ جوڑ نوں دنیا دے سامنے ننگا (بے نقاب) کرنا پاوے گا۔
میڈیا نال گل بات کردیاں پیپلز پارٹی دے چیئرمین نے بھارتی جاسوس کلبھوشن یادیو دے بارے وچ آکھیا کہ کلبھوشن یادیو پاکستان وچ دہشت گردی لئی آیا سی، اوہ ایتھے پکنک منان نہیں سی آیا۔ اوہناں دا کہنا سی کہ کلبھوشن یادیو دے ارادے سبھ دے سامنے سن۔
بلاول بھٹو زرداری نے الزام لایا کہ بھارتی تے اسرائیلی سازش دا سبھ توں سوکھا نشانہ بلوچستان اے، جدکہ کلبھوشن یادیو وی بلوچستان وچ علیحدگی پسند جتھیبندیاں تے دہشت گرداں دی مدد لئی آیا سی۔
اوہناں نے آکھیا کہ مسلم لیگ دی ‘اوکھے ویلے پیر پھڑنے تے سوکھے ویلے گل پھڑنے’ دی گل اوہناں نے نہیں بلکہ پیر پگاڑا نے کیتی سی۔ اوہناں دا کہنا سی کہ کشمیر وچ حالات خراب ہو چکے نیں تے اوہ ایہ دن کشمیر وچ نہیں سن دیکھنا چاہندے۔
بلاول بھٹو زرداری دا کہنا سی کہ حکومت تے ریاست دی پالیسی صاف اے جدکہ عوام تے احتجاج کرن والے جٹھیاں دے مسئلے وی سبھ دے سامنے نیں. اوہناں نے آکھیا کہ پاکستان پیپلز پارٹی ہمیشہ چاہندی اے کہ سارے مسئلے سیاسی طریقے نال حل کیتے جان۔
اوہناں نے صاف کیتا کہ پاکستان پیپلز پارٹی نے کدی وی چناؤ (انتخابات) اگے پاؤن دی گل نہیں کیتی، تے نہ ای پارٹی کشمیر وچ پہلے الیکشن ملتوی کروانا چاہندی سی تے نہ اج چاہندی اے۔
