شہرِ لاہور چ حبس تے تپش چ اضافہ، ہیٹ الرٹ جاری

ثمرہ فاطمہ: شہر چ گرمی دی شدت چ ہور اضافہ ہو گیا اے تے سورج دی تیز تپش پاروں موسم گرم تے حبس والا محسوس کیتا جا رہیا اے۔ بھاویں اسمان تے کتے کتے بدل ہے نیں، پر محکمہ موسمیات نے اج مینہہ پین دے کسے وی امکان نوں رد کر دتا اے۔

محکمہ موسمیات دے مطابق شہر دا ہُن دا درجہ حرارت 36 ڈگری سینٹی گریڈ ریکارڈ کیتا گیا اے، جدکہ اج ودھ توں ودھ درجہ حرارت 38 ڈگری سینٹی گریڈ تیکر جان دا امکان اے۔ گھٹ توں گھٹ درجہ حرارت 30 ڈگری سینٹی گریڈ رہن دی پیشگوئی کیتی گئی اے۔

ہوا چ نمی دا تناسب 51 فیصد ریکارڈ کیتا گیا اے، جدکہ چھ کلو میٹر فی گھنٹے دی رفتار نال ہواواں چل رہیاں نیں، پر ایس دے باوجود گرمی دی شدت چ کوئی خاص کمی محسوس نہیں کیتی جا رہی۔

محکمہ موسمیات دا کہنا اے کہ آؤن والے کجھ دناں تیکر موسم خشک رہن دا امکان اے تے مینہہ پین دی کوئی پیشگوئی نہیں کیتی گئی۔

شہریاں نوں ہدایت کیتی گئی اے کہ اوہ لوڑ توں بناں دھپ چ نکلن توں پرہیز کرن، پانی دا ودھ توں ودھ استعمال کرن تے گرمی توں بچاؤ لئی احتیاطی تدابیر اختیار کرن۔