یومِ عاشور: مرکزی جلوس دے روٹ تے بناں کسے رکاوٹ دے بجلی دی سپلائی لئی انتظامات مکمل
ش لیسکو نے یومِ عاشورہ دے موقعے تے مرکزی جلوس دے روٹ تے بناں کسے رکاوٹ دے بجلی دی سپلائی یقینی بناؤن لئی سارے انتظامات مکمل کر لئے نیں۔
لیسکو حکام دے مطابق مرکزی جلوس دے روٹ نوں 3 گرڈ اسٹیشناں توں بجلی فراہم کیتی جائے گی، جدکہ ایہناں گرڈ اسٹیشناں توں نکلن والے 11 فیڈراں نوں لوڈشیڈنگ توں چھوٹ دے دتی گئی اے۔ کمپنی نے داتا دربار تے میکلوڈ روڈ ڈویژن دے فیڈراں نوں وی مکمل طور تے لوڈشیڈنگ فری قرار دے دتا اے تاں جے عزاداری دے دوران بجلی دی سپلائی چ کسے قسم دی رکاوٹ نہ آوے۔
ہنگامی صورتحال نال نمٹن لئی جلوس دے روٹ تے 4 وکھ وکھ تھاواں تے جنریٹر وی نصب کر دتے گئے نیں، جلوس دے روٹ تے مجموعی طور تے 71 ملازم 24 گھنٹے فرائض سرانجام دین گے۔ ایس توں علاوہ ایکسیئن داتا دربار ڈویژن فیاض حسین تالپور نوں فوکل پرسن مقرر کیتا گیا اے، جدکہ لیسکو افسراں دی کنٹرول روم چ وی خصوصی ڈیوٹیاں لگا دتیاں گئیاں نیں ۔
