نوجواناں دی فنی تربیت حکومت دی اولین ترجیحات چ شامل اے، مریم نواز
ویب ڈیسک: وزیر اعلیٰ پنجاب مریم نواز نے پرواز کارڈ پروگرام دے تحت تربیت مکمل کرن والے نوجواناں نال ملاقات کردیاں ہویاں اوہناں نوں مبارکباد دتی تے آکھیا کہ ہنر مند نوجوان نہ صرف اپنے خانداناں دی بہتر کفالت کر سکدے نیں بلکہ ملک تے قوم دا قیمتی سرمایہ وی نیں۔
وزیر اعلیٰ مریم نواز نے پرواز کارڈ دے زیر اہتمام تربیت مکمل کرن والے امیدواراں نال خطاب کردیاں ہویاں آکھیا کہ پرواز کارڈ دے تحت تربیت یافتہ نوجواناں نوں بیرون ملک روزگار دے مواقع مل سکن گے۔
وزیر اعلیٰ نے آکھیا کہ 5 لاکھ توں ودھ نوجواناں نوں اوہناں دے پسندیدہ ہنر دی تربیت دے رہے آں، بیرون ملک غیر ہنرمند نوں اوہ مقام نہیں ملدا جیہڑا ہنر مند افراد نوں ملدا اے۔ وزیر اعلیٰ پنجاب نے آکھیا کہ اللہ تعالیٰ نے نوجواناں نوں لین والا نہیں بلکہ دین والا بنایا اے، ایس لئی اوہ اپنی صلاحیتوں تے محنت دے راہیں معاشرے چ مثبت کردار ادا کرن، بیرونِ ملک روزگار دے مواقع نوجواناں لئی انتہائی اہم نیں کیونکہ ایس نال بہتر آمدن دے نال نال قیمتی تجربہ تے جدید پیشہ ورانہ مہارتیں حاصل ہوندیاں نیں۔
اوہناں نے مزید آکھیا کہ اسکلڈ ورکرز نوں بیرونِ ملک زیادہ عزت تے بہتر معاوضہ ملدا اے۔ مریم نواز نے منصوبے دی کامیابی لئی عدنان چٹھہ تے اوہناں دی ٹیم دی کاوشاں نوں وی سراہیا تے آکھیا کہ نوجواناں دی فنی تربیت حکومت دی اولین ترجیحات چ شامل اے جدکہ ہنر مند افرادی قوت پاکستان دا قیمتی اثاثہ اے۔ وزیر اعلیٰ پنجاب مریم نواز نے آکھیا کہ بیرونِ ملک جان والے پاکستانی ورکرز چ 50 فیصد توں ودھ افراد غیر ہنر مند کیٹیگری چ شامل ہوندے نیں، جس پاروں اوہناں نوں بہتر تنخواہواں، ترقی دے مواقع تے پیشہ ورانہ شناخت دے حصول چ مشکلاں دا سامنا کرنا پیندا اے، اوہناں نے زور دتا کہ عالمی منڈی چ مقابلے لئی جدید مہارتوں دا حصول ناگزیر ہو چکا اے۔
اوہناں نے دَسیا کہ حکومت پنجاب نوجواناں نوں مقامی تے بین الاقوامی مارکیٹ دی ضرورتوں دے مطابق فنی تربیت فراہم کر رہی اے، ایس مقصد لئی کنسٹرکشن، ہاسپیٹیلٹی، ٹرانسپورٹ، لوجسٹکس، انجینئرنگ، انرجی تے ہیلتھ سمیت وکھ وکھ شعبیاں نوں ترجیح دتی گئی اے تاں جے نوجوان روزگار دے بہتر مواقع توں فائدہ چک سکن۔ اوہناں نے آکھیا کہ سعودی عرب تے ملائیشیا سمیت وکھ وکھ ملکاں دیاں کمپنیاں نال رابطیاں دے راہیں روزگار دے نویں مواقع پیدا کیتے جا رہے نیں تاں جے تربیت مکمل کرن والے نوجوان محفوظ، باوقار تے بہتر کیریئر دا آغاز کر سکن، اوہناں دا کہنا سی کہ اسکل ڈویلپمنٹ نہ صرف نوجواناں دے روشن مستقبل بلکہ ملکی معیشت دے استحکام دی وی ضمانت اے۔
وزیر اعلیٰ پنجاب نے آکھیا کہ حکومت نوجواناں دے روشن تے محفوظ مستقبل لئی عملی اقدامات کر رہی اے تے میرٹ، مہارت تے مواقع دا میل ای نوجوان نسل دی کامیابی تے پاکستان دی ترقی دی ضمانت اے۔ وزیر اعلیٰ پنجاب مریم نواز نے بیرونِ ملک روزگار لئی روانہ ہوون والے نوجواناں لئی نیک تمناواں تے دُعاواں دا اظہار کردیاں ہویاں آکھیا کہ ایہہ نوجوان درحقیقت پاکستان دے سفیر نیں، جیہڑے اپنی محنت، کردار تے پیشہ ورانہ صلاحیتوں دے راہیں دنیا بھر چ ملک دی نمائندگی کرن گے۔
