وینزویلا چ قیامت ورگا زلزلہ؛ درجنوں عمارتاں ڈھیہہ گئیاں، 32 بندے ہلاک تے 700 توں ودھ زخمی

نیویارک: وینزویلا چ اک توں بعد دوجے شدید زلزلے دے جھٹکیاں نے وڈے پدھر تے تباہی مچا دتی اے۔ مڈھلی طور تے 32 بندیاں دی موت تے 700 توں ودھ لوکاں دے زخمی ہون دی پکی خبر آئی اے۔ امریکی ماہرین دے مطابق زلزلے پاروں ہور ہلاکتوں دا وی ڈر اے۔

وینزویلا چ 7.1 تے 7.5 شدت دے زلزلیاں نے وڈی تباہی مچائی اے، جتھے اک 22 منزلہ عمارت سمیت کئی عمارتاں ملبے دا ڈھیر بن گئیاں نے۔ ڈرے ہوئے شہری اپنی جان بچان لئی گھراں تے دفتراں توں باہر نکل کے سڑکاں تے آ گئے۔ زلزلے توں فوراً بعد سونامی دی وارننگ وی جاری کر دتی گئی اے، جدکہ پورے ملک چ ایمرجنسی لا دتی گئی اے۔

زلزلے پاروں سکول تے ٹرین سروس نوں روک دتا گیا اے تے وڈے پدھر تے امدادی کماں دا سلسلہ شروع کر دتا گیا اے۔

امریکی ماہرین دا کہنا اے کہ زلزلے پاروں وینزویلا چ ہزاراں موتاں دا خدشہ اے، ایس زلزلے دا مرکز دارالحکومت کراکس توں 284 کلومیٹر مشرق ول سی۔

وینزویلا دا مرکزی ایئرپورٹ بند

وینزویلا دے وڈے بین الاقوامی ہوائی اڈے “مائیکیتیا” نوں زلزلے پاروں ہون والے ‘بھاری نقصان’ دی وجہ توں بند کر دتا گیا اے۔ وینزویلا دی قائم مقام صدر ڈیلسی روڈریگز نے قومی ٹیلی وژن تے گل بات کردیاں دَسیا کہ زلزلے نال ایئرپورٹ دے ٹرمینل نوں بڑا نقصان پہنچیا اے، جس پاروں اینوں بند کرنا پیا۔

امریکی جیولوجیکل سروے دے مطابق امریکی ریاست کیلیفورنیا تے نیڑے تریڑے دوجے ملکاں چ وی زلزلے دی شدت 5.6 ریکارڈ کیتی گئی اے۔ کیلیفورنیا دے شمالی علاقیاں چ 10 لاکھ لوکاں نوں الرٹ جاری کیتا گیا اے۔

شمالی جاپان چ 6.9 شدت دا زلزلہ

دوجے پاسے، شمالی جاپان چ وی 6.9 شدت دا زلزلہ آیا اے جس دے جھٹکے ٹوکیو تک محسوس کیتے گئے۔

جاپان دی موسمیاتی ایجنسی دے مطابق زلزلے دا مرکز ایواتی دا ساحلی علاقہ سی تے ایہہ 50 کلومیٹر ڈونگھا سی۔ حکام دا کہنا اے کہ جس علاقے چ زلزلہ آیا اے، اوہ سب توں زیادہ خطرے والا زون اے۔ جاپانی وزیر دفاع نے فوج نوں حکم دتا اے کہ اوہ زلزلہ زدہ علاقیاں دا فضائی جائزہ لے کے رپورٹ تیار کرے۔