وینزویلا چ بھچال نال تباہی، عمارتاں ملبے دا ڈھیر، موتاں اک لکھ تیکر ہو سکدیاں نے: امریکی ادارہ
بھچال دی شدت 7.5 ریکارڈ، 188 ہلاک، سینکڑیاں زخمی تے لاپتا، کئی ملبے تھلے دب گئے، حالت بہت سنگین، وینزویلا دی صدر ڈیلسی روڈریگیز ولوں دارالحکومت کراکس سمیت کئی علاقے متاثر ہون دی تصدیق، بجلی بند، ایمرجنسی نافذ، کئی ملکاں دیاں امدادی ٹیماں روانہ، اقوام متحدہ ولوں امداد دی اپیل، صدر تے وزیراعظم دا افسوس
لا گوایرا، کراکس (اے ایف پی، مانیٹرنگ ڈیسک): وینزویلا چ دو تیز بھچالاں (زلزلیاں) پاروں وڈی تباہی ہوئی اے، جِتھے 188 بندے مر گئے نے تے سینکڑیاں زخمی تے لاپتا نے۔ وڈیاں عمارتاں ڈھیہہ گئیاں نے تے ملبے تھلے دبے ہوئے لوکاں نوں کڈھن لئی عام شہری تے امدادی ٹیماں پورے زور نال جُٹیاں ہوئیاں نے۔ امریکی جیولوجیکل سروے مطابق وینزویلا دے شمالی حصے چ اک پچھے دوجا 7.2 تے 7.5 شدت دا بھچال آیا۔ پہلا جھٹکا بدھ دی دوپہر نوں کراکس توں تقریباً 160 کلومیٹر دور لہندے (مغرب) ول آیا، تے اک منٹ توں بھی گھٹ ویلے چ دوجا تیز جھٹکا محسوس کیتا گیا۔
امریکی جیولوجیکل سروے نے ڈر ظاہر کیتا اے کہ وینزویلا چ اس بھچال پاروں موتاں دی گنتی 10 ہزار توں اک لکھ تیکر جا سکدی اے۔ بھچال دے جھٹکے کولمبیا دے دارالحکومت بوگوٹا تے برازیل دے شمالی علاقیاں چ بھی محسوس کیتے گئے۔ ماہرین دا کہنا اے کہ وڈے جھٹکیاں توں بعد آن والے چھوٹے جھٹکیاں (آفٹر شاکس) نے نقصان ہور ودھا دتا اے۔
میڈیا رپورٹاں مطابق لا گوایرا سمیت کئی علاقے بری طرحاں متاثر ہوئے نے۔ عمارتاں چ تریڑاں پے گئیاں نے، کئی گھر ڈھیر ہو گئے نے تے لوک ملبے چوں اپنے پیاریاں نوں لبھ رہے نے، جدکہ سینکڑیاں لوک ہجے بھی لاپتا نے۔ ساحلی شہر کاتیا لا مار چ بجلی غائب اے۔ کراکس تے آلے دوالے دے علاقیاں چ بھی کئی عمارتاں زمین تے آ ڈگیاں نے۔ حکام نے دسیا کہ دارالحکومت دا ہوائی اڈا (ایئرپورٹ) بھی وڈے نقصان پاروں بند کر دتا گیا اے، جدکہ وکھو وکھ ملکاں توں امدادی ٹیماں وینزویلا ول نکل چکیاں نے۔ اقوام متحدہ نے اس حالت نوں انساناں لئی اک وڈی ہنگامی مصیبت قرار دیندے ہویاں پوری دنیا توں مدد دی اپیل کیتی اے۔
وینزویلا دی عبوری صدر ڈیلسی روڈریگیز نے دسیا کہ بھچال نال پورے ملک چ وڈے پدھر تے تباہی ہوئی اے تے حالت بہت خراب اے۔ مڈھلی رپورٹاں مطابق 188 لوک مر چکے نے تے 970 توں ودھ زخمی نے۔ ملک چ بجلی تے دوجیاں ضروری سہولتاں بند ہون پاروں تنگی ہور ودھ گئی اے۔ صدر مطابق کراکس دا ایئرپورٹ بند ہون نال امدادی کماں چ رکاوٹ آن دا ڈر اے۔ پوپ لیو نے وینزویلا لئی فوری طور تے اک لکھ یورو دی مڈھلی امداد بھیجن دا اعلان کیتا اے تے ویٹیکن دا کہنا اے کہ ایہہ صرف شروعات اے، ہور مدد بارے بھی سوچیا جا رہا اے۔ امریکی وزیر خارجہ مارکو روبیو نے آکھیا کہ امریکا سرکاری پدھر تے پوری مدد کر رہا اے تے امریکی فوج سامان پہنچان تے امدادی کماں چ وڈا حصہ پاوے گی۔
ماہرین مطابق ایہناں دوہاں جھٹکیاں نے اک صدی (سو سال) توں ودھ دا ریکارڈ توڑ دتا اے، ایہہ 7.5 شدت دا بھچال 29 اکتوبر 1900 توں بعد وینزویلا دا سب توں تگڑا بھچال اے۔ وینزویلا دی تریخ چ اس توں پہلے 1997 چ شمال مشرقی علاقے چ بھچال آیا سی جس چ 73 لوک مرے سن، جدکہ 1967 چ کراکس چ آن والے بھچال چ 236 جِنداں گئیاں سن۔ 1812 دے اک وڈے بھچال چ تقریباً 30 ہزار لوک مارے گئے سن۔
پاکستان دے صدر آصف زرداری تے وزیراعظم شہباز شریف نے وینزویلا چ بھچال نال ہون والے نقصان تے ڈونگھے دکھ دا اظہار کیتا اے۔ ایکس (ٹویٹر) تے اپنے پیغام چ صدر زرداری نے آکھیا کہ پاکستان دے لوک وینزویلا دے لوکاں دے دکھ چ برابر دے شریک نے۔ اوہناں نے زخمیاں دی جلدی صحت یابی لئی دعا کیتی۔ وزیراعظم شہباز شریف نے بھی وینزویلا دی حکومت تے متاثرہ ٹبراں نال ہمدردی کیتی تے آکھیا کہ مشکل دی اس گھڑی چ اسیں اوہناں دے نال کھڑے آں۔
دوجے پاسے، جاپان دے شمالی علاقے چ بھی 6.9 شدت دا تگڑا بھچال آیا اے پر اوتھے حکام دا کہنا اے کہ ہجے تیکر کسے جانی نقصان دی کوئی خبر نہیں ملی۔ جاپانی حکومت دے ترجمان منورو کیہارا مطابق حالت تے نظر رکھی جا رہی اے تے نقصان دا اندازہ لایا جا رہا اے۔
