پیٹرول دیاں قیمتاں وچ عوام نوں ریلیف نہ دیندے اُتے حافظ نعیم الرحمان نے حکومت نوں آڑے ہتھیں لے لیا۔
کراچی: امیر جماعت اسلامی پاکستان حافظ نعیم الرحمان نے پیٹرول دیاں قیمتاں وچ عوام نوں ریلیف نہ دیندے اُتے حکومت اُتے سخت تنقید کردیاں آکھیا کہ حکومت نے ثابت کر دِتا اے کہ اوہ عوام دی نئیں بلکہ آئل مارکیٹنگ کمپنیواں دی نمائندہ اے۔
تفصیلات دے مطابق امیر جماعت اسلامی پاکستان حافظ نعیم الرحمان نے پیٹرول دیاں قیمتاں وچ کمی نہ کرن دے حکومتی فیصلے نوں “شرمناک تے عوام دشمن” قرار دِتا۔
حافظ نعیم الرحمان نے آکھیا کہ عالمی منڈی وچ خام تیل دی قیمت 70 ڈالر فی بیرل توں وی تھلے آ چکی اے، پر ایس دے باوجود حکومت پیٹرولیم مصنوعات دیاں قیمتاں وچ کمی کر کے عوام نوں براہِ راست ریلیف دیون توں صاف انکاری اے۔
امیر جماعت اسلامی نے حکومت دیاں معاشی پالیسیاں اُتے تنقید کردیاں آکھیا کہ حکومت نے صرف 11 مہینیاں وچ ہی پیٹرولیم لیوی وصولی دا سالانہ ہدف پورا کر لیا سی، پر ایس دے باوجود عوام اُتے لاگو ایہ ٹیکس ختم نئیں کیتا گیا۔
اوہناں دا کہنا سی کہ ایہ انتہائی افسوسناک تے عوام دشمن گل اے کہ جنگ ورگے مشکل دنواں وچ وی غریب عوام توں بھاری پیٹرولیم لیوی وصول کیندی رہی۔
حافظ نعیم الرحمان نے حکومت اُتے الزام لاندیاں آکھیا، “ایہ گورننس نئیں بلکہ کھلی لوٹ مار اے، جیہڑی غریب تے مڈل کلاس طبقے دیاں جیبّاں اُتے ڈاکا مارن دے مترادف اے۔”
اوہناں مزید آکھیا کہ موجودہ حکمراناں نے اپنے فیصلیاں نال ایہ ثابت کر دِتا اے کہ اوہ عام عوام دے دکھ سکھ توں بے نیاز نیں تے عوام دی بجائے صرف آئل مارکیٹنگ کمپنیواں دے مفادات دی نمائندگی کر رہے نیں۔
