معصوم منتہیٰ زہرہ دے ابتدائی پوسٹ مارٹم وچ دل دہلا دیون والے انکشافات
سرگودھا: سات سالہ معصوم منتہیٰ زہرہ دی ابتدائی پوسٹ مارٹم رپورٹ سامنے آ گئی اے، جس وچ بچی دے جسم اُتے متعدد زخماں دے نشانات ملن تے موت دی وجہ شہ رگ کٹنا قرار دِتی گئی اے۔
تفصیلاں دے مطابق سرگودھا وچ سات سالہ معصوم منتہیٰ زہرہ دے بہیمانہ قتل کیس دی تحقیقات دا دائرہ ہور وسیع کر دِتا گیا اے۔ ابتدائی پوسٹ مارٹم رپورٹ وچ ہلا دینے والے تے دلخراش انکشافات سامنے آئے نیں۔
رپورٹ دے مطابق کمسن منتہیٰ نوں مبینہ طور اُتے زیادتی دا نشانہ بنان توں بعد نہایت بے دردی نال قتل کیتا گیا۔
پوسٹ مارٹم رپورٹ وچ آکھیا گیا اے کہ معصوم بچی دے جسم اُتے متعدد شدید زخماں دے نشانات موجود سن، جدکہ بچی دی موت دی حتمی وجہ “شہ رگ دا کٹنا” قرار دِتی گئی اے۔
پولیس حکام دے مطابق فرانزک تجزیے لئی ڈی این اے دے نمونے وی لیبارٹری بھیج دِتے گئے نیں تے حتمی فرانزک رپورٹ دا انتظار کیتا جا رہیا اے۔
پولیس دے مطابق کیس دا مرکزی ملزم محمد ارسلان پہلے ایہہ مبینہ پولیس مقابلے وچ ہلاک ہو چکیا اے، جدکہ واقعے وچ ملوث ہور نامزد ملزمان دے کردار دا وی باریکی نال جائزہ لیا جا رہیا اے۔
وزیراعلیٰ پنجاب دی خصوصی ہدایت اُتے معاونِ خصوصی شعیب مرزا نے ڈی پی او سرگودھا صہیب اشرف دے نال متاثرہ خاندان دے گھر جا کے تعزیت کیتی تے فاتحہ خوانی وی کیتی۔
مشیر وزیراعلیٰ نے متاثرہ خاندان نوں یقین دِوایا کہ حکومتِ پنجاب خود اس کیس دی نگرانی کر رہی اے تے خاندان نوں ہر صورت انصاف فراہم کیتا جائے گا۔
